Budget Allocation chungchang sawihona nei

Union Budget siam tura inpuahchahna kal mekah nimin khan Union Minister of Finance, Nirmala Sitharaman hovin ramchhunga State leh UT tin hruaitute leh an aiawh ten Video Conference an nei a, Mizoram atangin Chief Minister, Zoramthanga chu a tel a ni.

He hunah hian Chief Minister, Zoramthanga chuan Finance Minister hnenah hian COVID-19 hrileng avanga State in sum harsatna a tawh thu leh, India hmarchhak State te chu tlawhpawh harsa zawk hmuna awm an nih hlawm avanga hmasawnna tur sum (Development Fund) hrang hrangah pawh ngaih pawimawh ngai an nih thu a sawi a ni.

Chief Minister chuan Hrileng avangin sawrkar laipui a Chhiah lut a lo tlem in, chumi chuan state tin ten sawrkar laipui atanga an sum chan ve tur pawh a tlem phah avanga State te tan hmasawnna hna thawk tur chuan thui tak Externally Aided Projects ah an innghah a ngaih thu a sawi a. Hemi atan hian EAP sum hmuh te State in a lo dolet ve na tur (state share) chu 10% ah tihhniam leh ni se tiin Finance Minister hnenah hian a thlen a ni. Chief Minister chuan Fifteenth Finance Commission in kum 2020-21 chhunga State-te hnena Special Grants (cheng vbc. 6,764) pek ni se tia rawtna a lo siam, Finance Ministry in a lo hnawl tawh chu ngaihtuah that leh ni se tiin a thlen bawk a ni.