Chanchin thar thenkhat :

Inkaihhruaina kalpui zel dawn

Mizoram pumah thuleh awm hma chu ‘CO-VID-19 No Tolerance Drive’ hman chhunzawm a ni dawn. Hrileng mek laka invenna dan, ngaih-hnathiamna awmlova sawrkarin khauh zawka kalpuina, ‘COVID-19 No Tolerance Drive’ kalpui anih dan tur thu hi Disaster Management & Rehabilitation Department chuan thuchhuah siama tarlangin, nikum November ni 27 kaihhruaina alo tihchhuah tawh chu hman chhunzawm tura tih a ni a. Zan lam curfew, puipunna hmuna hmai-tuam, zirna In leh sakhaw biakna bakah pui-punna dang kalpui dan turah pawh inkaihhruaina chhuah hmasak ang leh, hman mek anga kalpui tur a ni ang. 

Inthlahdul deuh ngamawm ring

Indian Medical Association (IMA), Mizo-ram State Branch President, Dr. Rosangluaia chuan COVID-19 hri leng chungchangah  boruak a that chhoh chuan kar hnih hnu velah tun aia inthlahdul hret a ngamawm tawh a rin thu a sawi a. “Hei chen hi kan tuar tawh a, la fimkhur zel ila, kan dinhmun a that zel chuan tun ang lo deuha tlema intlahdul deuh hi sawrkarin a tih ngam ka ring a; mahse, Covid hma anga zalen taka Koh-hran programme leh programme dang neih ang chi erawh sawrkarin a la remtiin ka ring lo,” tiin Krismas leh kumthar boruak avanga kar hnih vel chu la fimkhur a tul thu a sawi bawk.

VC result danglam hret

Nikum August 27-a Village Council inthlanna neih tuma Lunglei District chhunga lungawilohna nei VC 16-a lungawilohna thlen te chu Election Tribunal in enfiahin Tawipui North-II VC a vote tla te chhiar that a nih hnuah VCP nihna chelh mektu Independent Candidate, T. Lalhnehzova chu tling zo ta lo a. Nikum a inthlanna neih ah khan T. Lalhnehzova leh Independent Candidate bawk, Ramnunmawia te chu an Vote hmuh inzatin Thum vawr a nih hnuah T. Lalhnehzova hi tling ah puan a ni a, amaherawh chu Vote chhiar that a nih hnuah Vote thi a lo awm a ni.

PC in AMC inthlan chuh tum

Peoples’ Conference (PC) Party chuan AMC inthlan chu party mala chuh an tum tih an sawi. Inrinni-a thuchhuah an siamah PC Party chuan Aizawl Municipal Corporation (AMC) inthlan lo awm turah Ward tinah candidate dah ngei tumin hma an la chho zel tih an sawi a, Party dang tan-rualpui emaw, thawhhopui emaw tum lova mal din ngei an tum tih an sawi bawk.

Serchhip bialtu MLA Lalduhoma, a nihna atanga paih thlak ngai khawp dinhmuna a din avanga Serchhip Constituency-ah bye election neih a ngai ta mai chu pawi an ti hle tih pawh sawiin, Serchhip bial chhung hmun hrang hrangah PC Party in mi leh sa an ngah nia sawiin, by-election lo awm turah hian Party mala chuh ve ngei nise tih party mipui atanga nawrna a nasa hle niin an sawi bawk.

Lei hawn hman theihloh

ZPM Thalaite chuan Chief Minister in Lei a hawn tawh hman theih a la ni lo chu pawi an ti hle tih an sawi. Inrinni-a thuchhuah an siamah ZPM Thalai chuan Bairabi tawntirh a Kawnpui lui Lei dawh mek chu tun thla ni 5 khan Chief Minister, Zoramthanga chuan a hawng tih sawiin, mahse he Lei dawh hi hawn anih hnuah hman theihin a la awm lo niin an sawi a. “MNF hian sawrkar chak tak anga lan an duh luat leh hming that an duh luat vangin Lei dawh zawhloh chu hawngin, mipui bum mai pawh an pawisa lo niin a lang,” an ti. ZPM Thalai chuan hna thawh chhunzawm hmuh tur awm si lova lungphum phum leh ringawt thin te, Lei dawh hna la thawh zawh loh hawn leh ringawt thin te chu sim tawh turin MNF sawrkar chu an ngen bawk.