Tuihna humhalh ah tanlak a tul

 Tuihna humhalh ah tanlak a tul

Tunhnai khan Irrigation & Water Resources Department hmalakna in Serchhip Mat Phai-ah leihnuai tui, kawlphetha hmanga lakchhuahna chu hlawhtling taka enchhin a ni a, hetianga leihnuai tui lakchhuah theih a ni hi a lawmawm in Serchhip in thlai chi hrang hrang kan tharchhuahna kawngah nasa taka min puih ngei pawh a rinawm a. Chutihrual chuan kan tuihna tlem tial tial avanga thlai chingtu ten harsatna an tawh mek hi pehhel lovin siamthat theih dan kawng pawh zawn tel ni thei se a duhawm hle a ni.

Kan hriat angin Serchhip khua hi lui pahnih in a karcheh a awm kan ni a, Tuikum lui hi Serchhip khawpui chawmna atana kan hman niin Mat lui erawh Zawlpui phai leh a vela thlai chingtu ten tangkai takin an hmang mek thung. Heng kan lui pahnih ah hian Tui erawh a tlem tial tial niin a lang a, Mat phai-ah phei hi chuan thlai chingtute mamawh tui a harsa tial tial a, Mat lui mai bakah a fintu Kawrhte ah te Tui a tlem tial tial bawk si avangin Tui indaihlohna a nasa tial tial chho thei dawn niin a lang.

Hetiang a nih avang hian thlai chingtu te harsatna sutkianna atan hetianga leihnuai tui lachhuak tura hmalakna pawh hi kalpui ni ngeiin a ngaih theih a, amaherawh chu hetianga hmalakna hi a senso a san thin avang leh kan mamawh zawng zawng a phuhruk theih dawnloh avangin kan ram leilung in a kentel sa, kan luikawrh-a tuihna awm te hi a humhalh kawngah tan kan lak a pawimawh hle mai a. Sawrkar mai bakah mipuite hian tun atanga kan tuihna neih te humhalhna ah tan kan la a nih chuan awmzia ala nei thei a ni tih hriain tuihna awmsa humhalh leh a tihpun kawngah hian tan i la zel teh ang u.