Bird Flu lakah Mizoram ala him tih an sawi

India ram hmun thenkhata leng mek Arva pulhri (Bird Flu) lakah Mizoram a la him niin AH & Vety Department chuan an sawi. Avian Influenza tia sawi bawk.

Bird Flu hi India ram State 8-ah lengin inkhuah-khirhna kalpui mek a ni a, Mizoram-ah erawh chuan tun thlengin he hri vei hi hmuh a la ni lova, chi-aina tur a awm lo tih AH&Vety Department hotute chuan an sawi a ni. AH & Vety Department Joint Director, Dr. Lalhmingthanga chuan Arva pul hri lakah hian Mizoram chu a inralring reng tih sawiin, tunah hian District tinah Rapid Response Team te chu koh theih mai turin an awm reng a, invenna tur damdawi leh hmanrua te pawh an dapkhawm mek tih a sawi a, Vawiin hian Chief Secretary hovin District tina invenna kalpui dan tur kaihhruaina siam a nih dawn thu sawiin, hemi hnu hian District Level Coordination Committee te chu District tina Bawrhsap te hovin an hmalak dan tur a rel leh dawn a ni.

Tun dinhmunah Ar lakluh khap a la nih loh thu Dr. Lalhmingthanga chuan a sawi a, Birds Flu lakah hian Mizoram a him theih nan theihtawp chhuah a nih tur thu a sawi bawk.

AH&Vety Department chuan tuna India ram state thenkhata leng mek hi H5N1 leh H5N8 Strain a ni tih pawh sawiin, heng hri insiam danglamte hian mihringah natna thlen thei mahse India ramah he natna hi tun thlengin mihring in an vei tih finfiahna a la awm lo tih an sawi a. Avian Influenza hi mihring in Ar atangin an kaichhawng thei naa, kaichhawn har tak a ni a. Mihring leh mihring inkaichhawn theih tih finfiahna a la awm lo tih an sawi a. He natna vei hi mihring te zingah za a sawmruk in an thihpui thei ve thung a ni. He natna hi mihring in Ar atangin an kai chhawng thei tih chu kum 1997 khan Hongkong-a Avian Influenza len atang in finfiah a ni.