Property Tax atangin nuai 1,193.07 hmu tawh

Aizawl Municipal Corporation (AMC) chuan Property Tax atangin cheng nuai 1,193.07 a hmu tawh a, AMC hian mi 5,854 hnenah Insak phalna a pe tawh bawk.

AMC hian kum 2015-16 leh 2019-20 chhungin Property Tax atangin cheng nuai 1,193.07 hmu tawh a, kum 2020-21 atan khawn chhunzawm mek niin kumin-a Property Tax atanga sum lut zat hi hriat a la ni lo thung. Kum 2015-16 atanga khawn tan Property Tax-ah hian sum hmuh zawng zawng zaa 80 (80%) hi mipuite hmasawnna hna thawhna atan mipuiah peklet leh thin a ni. 

AMC hian June 1, 2018 atanga nikum kum tawp thleng khan AMC Building Regulations hnuaiah mi 5,854 te chu In sak phalna an pe tawh a, AMC Town Planner, Ralthuama Ralte chuan tunhnai kum 2 leh a chanve chhung velin AMC huamchhungah In sak dil mi 6,628 an awm tih a sawi a, dilna lut zingah enfiah mek 683 a awm a, dilna hnawl 29 (reject) a awm bawk. AMC Town Planner sawi danin In sak dil dan diklo leh dan bawhchhiaa In sak vanga chawlh lailawktir mi 30 bawr vel an awm bawk a ni.