Latest News

Aizawl-ah Larsap hovin Republic Day hman a ni

India Republic Day vawi 72-na chu nimin khan Mizoram-ah pawh urhsun taka hman niin Mizoram-a he ni lawmna pui ber chu Aizawl Sipai Lammual-ah Governor P.S. Sreedharan Pillai hovin neih a ni.

Aizawl-a Republic Day lawmna ah hian Governor chuan Parade Contingent ruat bik ten Hnam Puanzar zahna chibai an buk chu chhangletin mipuite hnenah thuchah a sawi a. He hunah hian Governor chuan Zoram mipuite duh-sakna chibai bukin, COVID-19 hrileng karah pawh he hun pawimawh tak hi India khua leh tui te chuan an awmna hmunah theuh Hnam Puan-zar pawtparhin inpumkhatna lantirin an hmang a ni, a ti a. India ram leh India mipuite hmalam pana kan pen mek lai hian keini leh kan fate chauh ni lo, mitin tana hmalam hun muanawm leh phurawm tak a lo thlen theih nan ram hrang hranga chengte nena pheikhai rual taka kal chu an duhdan a nih thu a sawi a ni.

Ramchhung kiltin hmasawnna turin sawr-kar chuan hna a thawk tih sawiin Mizoram Governor chuan, COVID-19 hripui leng kan hma-chhawn meka, he hunah hian India ram tanrualna hi khawvel hmung dangte tan pawha zir tham, keini tan mahni intodelh tulzia min zirtirtu a ni tih a sawi a. He hunah hian ‘Atmanirbhar Bharat – India, Ram intodelh’ tih pawimawhna pawh kan hrechiang thar leh a ni, a ti bawk.

Mizoram Governor chuan COVID-19 hrileng chu a reh mai dawnin a lang lo tih sawiin, Mizoram mipuite fimkhur chhunzawm zel turin a chah a. “Kan himna tura sawrkarin inkaih-hruaina a siam te tha taka kan zawm avangin Mizoram chu COVID-19 avanga tuar nep ber State kan ni thei a ni,” a ti a. “He hunah hian COVID-19 dona kawnga State Sawrkar, Kohhran, tlawmngai pawl leh vantlang mipuite thawhhona leh inpekna ka chawimawi nawn leh a ni,” a ti bawk.

Comments

Chhiar Hlawhte