Mizoram Khawpui fai ber-ah Lunglei thlan a ni

Urban Development & Poverty Alleviation Department in ‘Mizoram Khawpui Fai Intihsiakna 2020’ a buatsaih result chu nimin khan puan niin Lunglei chu Mizoram khawpui fai berah thlan a ni.

‘Mizoram Khawpui Fai Intihsiakna 2020’ lawmman hi nimin khan Aizawl Sipai Lammual-ah sem niin Mizoram Governor, PS. Shreedharan Pillai chuan a hlan a, Khawpui Fai Insiakna, 2020 Category-I (District Hqrs)-ah Lunglei chuan lawmman pakhat dawngin, Saitual in lawmman pahnihna leh Khawzawl in lawmman pathumna an dawng a. Category-II (Town)-ah Biate chu pakhatna niin Lengpui in lawmman pahnihna leh North Vanlaiphai in lawmman pathumna an dawng a ni.

Category I leh II belhkhawma a vai (Overall)-a fai ber thlanna ah Lunglei in pakhatna dawngin Biate in pahnihna leh Saitual in pathumna an dawng a. Village Council thawktha pakhatna Lengpui VC in dawngin Tlabung VC in lawmman pahnihna leh Bairabi Joint VC in lawmman pathumna an dawng a, Best Nodal Officer Award chu Dorothy Muansangi, SDO (Civil) North Vanlaiphai hnenah hlan a ni bawk.

Lammual-a hun hman zawh hnu hian Aijal Club-ah heng lawmman dawngtute lawmpuina hun hi buatsaih niin he hun hmanpuitu UD&PA Department changtu Deputy Chief Minister, Tawnluia chuan ‘Khawpui Fai Intihsiakna 2020’ a lawmman dawngtute chu a lawmpui thu sawiin, sawrkar chu a bultumtu chauh a nih thu leh a taka thawktute chu Village Council te, Local Council Member te leh tlawmngai pawl te an ni tih a sawi a. Faina ngainat kawngah theihtawp chhuah zel turin lawmman dawngtute bakah he intihsiakna a tel khua 23 te chu a sawm a. Mizoram pumpui chu ODF (pawnlera inthiar awmlo) a ni tawh tih sawiin, ODF+ ni turin UD&PA Department chuan tan a la mek a a ni tih a sawi a, Faina beihpui hi pawngpaw tih chi a nilo a, mi rilru-ah tuh a nih loh chuan awmzia thui tak a awmtheilo tiin a sawi bawk.

He hun hi I&PR Minister, Lalruatkima pawhin hmanpuiin ram a changkan ang zelin chhungtin in bungrua tam tak kan neih belh zel a, heng te hi a tih riral danah leh a sawngbawl danah Sawrkar in Dan a siam te hi kan zawm that a ngai hle a ni, a ti a. Faina kawngah hian thil pawimawh pali - Sawrkar leh mipuite tanrual pawimawhna te, Taimak hi Faina bul intanna a ni tih leh COVID-19 pawh hi a dona tha ber pakhat chu kutsil fai a ni a, hei hian faina chu natna laka min vengtu a ni tih a tilang tih a sawi bawk. Nimin-a he hun hman hi UD&PA Department-a Commissioner & Secretary, Dr. C. Vanlalramsanga chuan kaihruaiin lawmman dawngtute hnenah hian Deputy Chief Minister, Tawnluia hian lawmpuina thilpek a hlan bawk a ni.