ZPM Val Upa Council in mimal inhuphurhna ah ngai

ZPM Val Upa Council chuan MLA atanga Lalduhoma chawlhtir a ni chu ama mimal hu-phurna leh itsikna avang ni ngeia an hriat thu sawiin, Speaker thil tih dan chu an dem takzet tih an sawi.

ZPM Val Upa Council (VUC) hian nimin khan thuchhuah siamin Assembly Speaker-in ZPM Legislature Party Leader, Lalduhoma MLA a nihna a hlihsak chungchang chu ngun takin an ngaihtuah tih sawiin, Lalduhoma leh ZPM Candidate dangten MLA inthlan an chuh khan ZPM chu Political Party-a din a nih tawh thu leh, Manifesto mumal tak leh Common Symbol pawh nei nia sawiin, amaherawh chu khatih lai khan ZPM chu Party ding hlim a ni a, Registration leh Recognition a la nei hman lova. Hei vang mai hian Independent anga an chuh a tul a ni, an ti.

Heng mite hi ZPM Political Party Candidate an ni tih sawiin ZPM Val Upa Council chuan, “VUC hmaah pawh ZPM-a rinawmna thu an tiam thlap a ni,” an ti a. ZPM MLA zawng zawngte chu inthlan dawna an dinhmun leh tuna an dinhmun a la ngai reng tih sawiin, Anti-defection dan tum leh siam chhan, Statement of Objects and Reasons-in a sawi chu uire/phatsan (defection) khap a ni a. ZPM MLA te hian party emaw, thlangtu mipuite an phatsan hauhlo niin an sawi a. Hetianga Speaker-in Lalduhoma MLA a nihna atanga a chawlhtir hi ama mimal huphurna leh itsikna avang ni ngeiin VUC chuan an hriat thu an sawi a ni.

Hetihlai hian nimin khan MNF Thalaite chuan thuchhuah siamin Nov. 27-ah Independent MLA, Lalduhoma chu MLA a nihna atanga bantir (disqualify) a ni tih sawiin, tun thlenga ZPM Party an la ngawi reng chu an party chhungah inhuphurh tawnna a awmzia tilangtu ah an ngaih thu leh a thlavang hauhna thu vawi khat mah an la chhak chhuak lo chu thil mak a nih thu an sawi bawk.