Latest News

Meizu mi 6 man leh an ni

Serchhip District Anti-Tobacco Squad te chuan Inrinni zing khan Serchhip Bazar building leh a chhehvel bakah Taxi leh Auto Rickshaw Stand-ah te Squad Drive an nei leh a, heng hmun an tlawhna ah hian Sikret leh Vaihlo kaihhnawih khuahkhirhna Dan bawhchhia a puipunna leh vantlang hmun-a meizu mi 6 an man leh a, heng mite hi pawisa chawitir nghal an ni.

ZPM in Law Court-a kal an tumloh thu sawiin, by-election ah Lalduhoma an din tir leh dawn

Zoram Peoples’ Movement (ZPM) Party chuan MLA atanga Serchhip bialtu MLA, Lalduhoma ban a nih chungchangah Law Court-ah kal an tumlo tih sawiin, Serchhip bial-a by-election lo awm turah ZPM Party aiawhin Lalduhoma chu a ding leh dawn tih an sawi bawk.

Nimin chawhnu khan Aizawl-a ZPM Office-ah ZPM Vice President, K. Sapdanga chuan thuthar thehdarhtute kawmin Mizoram Assembly Speaker in ZPM Legislature Party Leader, Lalduhoma chu MLA atanga ban a nih thu Nov. 27, 2020-ah khan a puan thu leh, he thu hian amah thlangtu ZPM mipuite leh Mizoram mipui, a bikin sawrkar Kalphung Thar duhtute rilru a hliam na hle tih an sawi a. MNF MLA 12 ten Lalduhoma an hekna chu an zirchian thu leh Lalduhoma duhdan leh Law lama an mithiamte duhdan chu Law Court-a kal a, Lalduhoma an hekna hi cho let ngei ni se tih a ni tih a sawi a ni.

ZPM Vice President chuan hetihrual hian, Lalduhoma thlang tlingtu Serchhip bial chhunga mipuite hnenah an ngaihdan thawhna bawm, ZPM Tall Free siam ah ZPM mipuite mai ni lovin, Serchhip bial chhunga mipuite pawhin ngaihdan an thawh tih sawiin, ‘Law Court-a kal’ thu leh bial mipuite ngaihdan ‘Mipui Court-a kal’ chu ZPM Political Affairs Committee chuan ngun taka ngaih-tuahin he thubuai hi dan bawhchhiatna avanga inhremna ni lovin, politics-a inbeihna liau liauah an pawm tih a sawi a. Chuvangin amah thlangtu mipuite leh duhsaktu mipuite rawtna chu zawm zawk thaa an hriat avangin Law Court-a kal lovin Mipui Court-a kal a, mipuiten thutlukna an siam theih tura mipui hnena zualko a rel ta tih a sawi.

ZPM Vice President chuan loh theih lohva Mipui Court-a kal tur an lo nih takah chuan, by-election buatsaih a nih hunah Pathian in rem a tih chuan Lalduhoma hi ZPM Party aiawhin a ding leh ngei ang tih a sawi a, Mizoram-ah dikna (justice) zahawmzia puanchhuahna remchang a ni tih hria a, khawngaih vote lo pe theuh turin ZPM chuan Serchhip bial mipuite an sawm tih he hunah hian a sawi bawk a ni.

Comments

Chhiar Hlawhte