R. Hrangthanga thih dan chhui zui mek a ni

Kumin November ni 23-a Thenzawl Police Training School (PTS)-a IVth Grade hnathawk boralta, R. Hrangthanga thih dan chu Sawrkar-in a chhui chiang mek.

Health Department hotute sawi danin, R. Hrangthanga thih dan hi a chhui chiangtu tur Committee din a ni a. An ni hian tunkar Thawhtanni khan Thenzawl leh Serchhip an tlawh a, hetah hian R. Hrangthanga thawhna PTS hotute leh Serchhip-a Health Department hotute an kawm a, an ni hian an thil hmuh dan Sawrkar-ah an thlen anga, chuta tang chuan COVID-19 vanga thi a nih leh nih loh hriat a ni dawn a ni.

Tarlan tawh angin Thenzawl Police Training School-a IVth Grade hnathawk R. Hrangthanga hi PTS Staff mi 61 Bihar inthlana Duty-a kal zinga mi a ni a. November ni 12 khan Bihar atangin an lo haw a, hemi ni hian Rapid Antigen Test hmanga a sample enfiah niin COVID-19 hri a kai tih hmuhchhuah a ni a, hemi zan hian Serchhip-a Nursing School CCC-ah enkawl tura rawn lak nghal a ni a, Nov. 22-ah hri lakah fihlimin PTS lama inkhunghrang zui tura chhuahtir lehin a tuk Nov. 23-ah a boral zui ta a ni.

Hetianga CCC atanga a chhuah tuk mai-ah a boral avang leh amah ah insawiselna a neih hriat a nih loh avangin fimkhur thilah Thenzawl CHC-a Sample Management Team chuan Rapid Antigen Test hmanga a sample enfiahin TrueNat Laboratory-ah a sample enfiah a ni bawk a, hetah hian COVID-19 hri ala kai tih hriat a ni a, hei vang hian a ruang pawh hi hri kai thi te anga sawngbawl a ni a. Amaherawh chu sawrkar chuan COVID-19 avanga thi zingah ala chhiar tello thung a ni.