Latest News

Volleyball Court (Indoor) keng tel ‘Youth Centre’ sakna tur lungphum Serchhip-ah phum a ni

Cheng vbc. 3 seng-a Serchhip Darnam Tlang-a ‘MYC Youth Centre’ sak tur lungphum chu nimin khan Mizoram Youth Commission (MYC) Chairman, Dr. Vanlaltanpuia MLA chuan a phum a, he Youth Centre hi kum thum (3) chhunga sak zawh hman tura ruahman niin Inchhung-a Volleyball khelhna tur pawh a awm thei dawn a ni.

MYC Youth Centre lungphum phumna puala inkhawm hun tawi Darnam Branch YMA Library Hall-a neihah MYC Chairman, Dr. Vanlaltanpuia chuan Serchhip in Youth Centre an nei tur chu a lawmpui thu sawiin, tha tak leh tluang taka sak zawh anih theih nana thawhpuiah Serchhip mipuite a sawm a. MYC hi Mizo thalaite tana ruahmanna an siam thenkhatte a tarlangin; Mizo thalaiten Central Service an tlin theih nan MYC kaltlanga sawrkarin thalai 20, a thlawn veka State pawna Coaching kal tir an tum thu a sawi a, a kal turte zawnna hi December thla vela buatsaih theih an beisei thu a sawi a. Hei bakah hian State chhungah Offline Coaching Centre hmun li-ah din an tum thu a sawi a, chutiang Centre din turin Mizoram chu Zone pali thenin Aizawl, Lunglei, Siaha leh Kolasib-ah te din tum a nih thu a sawi bawk.

MYC Chairman chuan COVID-19 avanga State danga hnathawk lo haw te umzuina hmalakna pawh chak taka bawhzui zel anih thu a tarlang bawk a. Sipai lama kan thalaite an luh tam zel theih nan training an buatsaih thin thu leh Vairengte-a inbun Sipai training-na hmun tha, CIJW School-ah te Training neih pui thin an nih thu a sawi a. Mizote chu Pathian in theihna ropui tak neiin min siam nia a hmuh thu pawh sawiin, Football-ah te, Music-ah te, Fashion Designing ah te leh kawng dang dangah kan thalaite an duai lo hle a. Heng theihna kan neihte tuaihriama tihpun zel hi MYC thiltum ber a ni, a ti a. Serchhip-a Youth Centre pawhin a tum pawimawh tak chu Serchhip thalaite theihna tihpuna, tuaihriam a ni tih a sawi bawk.

Nimin-a he hun hmanna ah hian MYC Secretary, Donny Lalruatsanga MCS chuan report pein he Youth Centre hi NEDP/SEDP atanga sak niin Brilliant Consultancy in an thawk mek tawh tih a sawi a, kum thum chhunga zawh tura ruahman a nih thu sawiin, Hnathawktuten tha taka hna an thawh theih nan a Veng neitute leh Serchhip mipuite thawhpuina kan mamawh hle a ni, a ti a. Project Cost hi cheng vbc. 3 niin chhawng thum-a sak tur a ni a. A dung ft. 100 a vang ft. 85 a ni anga, Motor dah theihna tur te, Chowkidar Quarters te, Mikhual 20 thlen theihna Room pahnih, Committee Room leh Indoor Volleyball Court te a awm tura duan a ni.

MYC Youth Centre sak tur lungphum phumna hun hi Serchhip Addl. DC, Lalmuansanga Ralte chuan kaihruaiin Serchhip thalaite tana chhenfakawm tak tur Youth Centre, Mizoram Youth Commission in an ngaihtuah sak avangin lawmthu a sawi bawk a ni.

Comments

Chhiar Hlawhte