Serchhip bial mipuite zahlo ah ZPM in ngai

Serchhip bialtu MLA, Lalduhoma ban a nih chungchangah Serchhip Block ZPM chuan Serchhip bialtu MLA ban a nih theihna tura hektute chuan Serchhip bial mipuite an zahlo hle ah an ngai tih an sawi.

Nimin a thuchhuah an siamah ZPM Serchhip Block chuan MLA atanga inbanna hi Lalduhoma duh taka thlangtu, Serchhip Bial mipui leh ZPM Serchhip Block Commitee chuan mak takah an ngaih thu leh pawi an tih thu an tarlang a, “Serchhip Bial mipuite hi min phatsan ahnekin, Opposition MLA ni chungin Serchhip Bial tan a theihna zawngah hma a la a, kuthnathawktute leh loneitu ten an mamawh an thlen apiang chak takin a theihna chinah hma a laksak nghal zel zawk thin a ni. NGO leh Sport Association hrang hrangin mamawh an thlenah hma a laksak zung zungin, MLA Fund atangte in a min phuhruksak thin zawk asin,” an ti. ZPM thuchhuah chuan Bial mipuite chu Lalduhoma lamah an tang tlat dawn tih an sawi bawk.