Latest News

Thenzawl-ah hri danna pe tan; ni 2 chhungin mi 306 te hri danna pe tawh

Serchhip District-a COVID-19 Vaccine pek mekah nimin khan Thenzawl CHC-ah hri danna hi pek tan ve leh a ni a, he hun hi Thenzawl SDO (C), Kulothungan A, IAS chuan hmanpuiin sawrkar ruahman anga Vaccine lak runpui India ramah kalpui a ni leh Thenzawl-ah pawh kalpui theih a ni chu lawmawm a tih thu sawiin, Vaccine chuan mipui himna a thlen ngei a beisei thu a sawi.

Hri kai thar leh dam awm

Niminpiah khan Serchhip District-ah COVID-19 hri kai mi pakhat hmuhchhuah niin nimin khan hri kai pakhat chu enkawl dam a ni bawk.

Niminpiah khan Serchhip District-a TrueNat Laboratory-ah Sample 20 enfiah niin Rapid Antigen Test hmangin Sample 72 enfiah a ni bawk a, TrueNat Laboratory-a Sample enfiah atang hian CO-VID-19 hri kai mi pakhat hmuhchhuah niin mipa kum 43 mi, West Bengal atanga lo kal a ni a. Tantia Construction Company hnuaia hnathawk tur niin inkhunghranna hmuna awmlai leh taksa-a hri kai lanchhuahna neilo a ni bawk.

Nimin khan Serchhip District-a CO-VID-19 hri kai mi pakhat chu enkawl dam leh a ni bawk a, hri kai enkawl dam tak hi Nov. 17-a hri kai hmuhchhuah, Bhavia Company hnuaia thawk tura State pawn atanga rawn lut niin thla khat chuang zet enkawl a nih hnuah TrueNat Laboratory-ah a Sample enfiahin hri laka a fihlim tak avangin nimin khan chhuahtir a ni ta a ni.

Heti hian nimin thleng khan Serchhip District-a COVID-19 hri kai hmuhchhuah chu 177 an tling ta a, an zinga 167 te chu enkawl dam ni tawhin tunah hian hri kai enkawllai 9 an la awm mek a, an zinga 8 hi CCC-a enkawl niin midang pakhat hi Home Isolation-a enkawl a ni thung.

Comments

Chhiar Hlawhte