Latest News

Meizu mi 6 man leh an ni

Serchhip District Anti-Tobacco Squad te chuan Inrinni zing khan Serchhip Bazar building leh a chhehvel bakah Taxi leh Auto Rickshaw Stand-ah te Squad Drive an nei leh a, heng hmun an tlawhna ah hian Sikret leh Vaihlo kaihhnawih khuahkhirhna Dan bawhchhia a puipunna leh vantlang hmun-a meizu mi 6 an man leh a, heng mite hi pawisa chawitir nghal an ni.

Serchhip Press Club sak thar I&PR Minister, Lalruatkima’n a hawng

Mizoram Journalist Association (MJA) Serchhip District in 'Serchhip Press Club' an sak thar chu nimin, December 15, 2020 khan I&PR Minister, Lalruatkima chuan a hawng a, Rev. B. Lalengzauva chuan Tawngtaiin Pathian hnena hlanna a nei nghal bawk.

Press Club hawnna puala Inkhawm nimin-a Serchhip Press Club-a neih ah hian I&PR Minister, Lalruatkima chuan  Press Club pawimawhna leh tangkaina te an hriat thu sawiin, theihtawpin District hrang hrang Press Club te tihchangtlunna tur ngaihtuahpui zel an ni tih a sawi a. Chanchinbu chu sawrkar hmalakna mipuiten an hriatna leh mipuiten thudik an hriatna a ni tih sawiin, Media rintlak ni tur chuan duhsak bik leh tlei bik neih a thiang lova, khawtlang leh ram tana tha tur a nih chuan thu dik ziah mai tur a ni, tiin ramdang Media-te el pha thei turin Mizoram Journalist te chuan theihna an neih thu leh chumi tur chuan tan an lak a ngaih thu a sawi a, Media tihhmasawn kawngah theihtawp kan chhuah a ngai tih sawiin, Media tello chuan sawrkar a kal thei lo tih a sawi bawk.

I&PR Minister chuan Social Media hman dan kawngah pawh inzirtir kan la ngai nasa tih sawiin, thu khal lutuk leh dengkhawng lutuka kan indeng fo mai chuan kan ram a tichhe mai ang tih a hlauh thin thu a sawi a, thalaiten chanchinbu leh lehkha chhiar an thlahthlam lutuk chu tha lo a tih thu leh hemi kawnga inzirtir nasat ngai a tih thu a sawi bawk.

Tun dinhmunah chuan MJA leh sawrkar thawhhona a tha tih pawh I&PR Minister chuan sawiin, Journalist pension Scheme pawh Sub-Committee lamin an buatsaih fel tawh a, sawrkarin a ennawn leh ang a, a puitlin thuai theih a beisei thu a sawi bawk.

Serchhip Press Club hawnna hun MJA Serchhip District Vice President, C. Rameng-mawia kaihhruaia neih ah hian MJA Serchhip District President, Kapliana Pachuau chuan MJA Serchhip District ten Press Club an nei ve ta chu lawmawm a tih thu sawiin, Serchhip District tan pawh hmasawnna thar a nih thu a sawi a. Tunhma lama Press Club an lo neih tawh chu AYUSH OPD/Ward sakna atan an lo hlan tawh thu sawiin, hun engemaw chen Press Club nei lova an awm hnuah member te thahnem ngaih tlanna avanga Press Club an nei ta chu lawmawm a tih thu a sawi a, Press Club chu Pawl leh Kohhran bil ta ni lovin, mi zawng zawng ta, mi zawng zawng lenna hmun a ni tih a sawi a, mipuite chu tangkai taka hmang turin a sawm bawk a ni.

MJA General Hqrs. President, Zonun-sanga Khiangte pawhin Serchhip in Press Club a nei chu Serchhip District lawm ang tho in MJA General Hqrs. pawh an lâwm tih a sawi a, Press Club atana thilpek petute hnenah hnenah lawmthu sawiin, Serchhipa Sawrkar Department leh MJA-ten thawhhona tha tak an neih chu chhawm nung zel turin a chah bawk.

Serchhip Press Club hawnna hunah hian MJA Serchhip District General Secretary, T. Biakchamliana chuan Serchhip Press Club sak a nih dan report pein Serchhip Press Club sakna atan hian Health & Family Welfare Department ram chu hawh niin May ni 30, 2018 khan khatih lai a Chief Minister, Lal Thanhawla chuan lungphum phumin a sak bul tanna turin cheng nuai 10 a pe bawk a, he sum hmang hian a sak hna hi Feb. 23, 2019 khan thawh tan a ni a, hemi hnu hian Rajya Sabha MP kalchhuak ta, Ronald Sapa Tlau chuan MP Fund atanga cheng nuai 2 pe lehin he sum hmang hian niin-a hawn tak hi luah theih tura peihfel a ni ta a, a mamawhte tana hman theih dan tur pawh ruahman nghal a ni bawk.

Serchhip Press Club hawnna hunah hian sawrkar in hri leng laka kaihhruaina a siam te zawm chungin mi sawmbik te an tel a ni.

Comments

Chhiar Hlawhte