Latest News

Chanchin thar thenkhat :

Supply Minister in tlangzarh

Mizoram Consumers’ Union buatsaih ‘Consumer Chhantu’ (monthly magazine) leh Prof. Chawngsailova ziah ‘Ram Ropui-II’ tih te chu nimin khan Supply Minister, K. Lalrinliana chuan a Pisa-ah a tlangzarh a. Heng lehkhabu tlang-zarhna hunah hian Supply Minister chuan mipuiten dikna chanvo an chan theih nana Mizoram Consumers’ Union ten thlatin chhuak tur ‘Consumer Chhantu’ an buatsaih chu lawmawm a tih thu sawi a. I.T leh Social Media chak tak karah engkim kan inhre pawh zung zung a, amaherawhchu Consumer chungchanga Act, Rules leh sawrkar thuchhuah leh Consumer case hrang hrangah te Print Media hman tangkai a pawimawh thu a sawi bawk. Consumer Chhantu hi kum 1999 khan chhuah tan niin, July ni 27, 1999-ah RNI registration hmuh a ni.


Hnahthial hel tur duhlo

Aizawl leh Tuipang inkar NH. 54 laihzauh turah Hnahthial helna tur, by-pass road siam a ni chu duh lovin Hnahthial-a chhungkaw 70 velin kawngpui laih tanna tur, Hnahthial hmarlam a kawngpui an ping. NH. 54 laihzauh turah hian Hnahthial helna tur siam tur hian ruahmanna engkim siam fel ni tawhin KM 6.8 a thui kawng siam a ni dawn a, NHIDCL hnuaiah M/S Mathiyan Construction Pvt. Ltd. ten an thawk dawn a, hei hi heng mite hian duh lovin Hnahthial khawpui chhung, National Highway-54 kalna pangngai ah kal leh se an duh tih an sawi a. Kawngpui thar kalna tur, Hnahthial tlaklam chu a lei a ngheh loh avangin harsatna dang a thleng thei niin an sawi bawk.


Slogan inphuahsiakna nei

Special Summary Revision of Photo Electoral Roll, 2021 puala Khawzawl District Election Office in Slogan inphuahsiak a buatsaih ah nimin khan lawmman semna neih niin ‘Vote in man a neilo, Mahse i vote in ram a siamtha thei; Roll-ah in register ngei ang che’ tih phuahtu B. Vanlalruatfela, Khawzawl Vengthar chuan lawm-man pakhatna a dawng.


Champhai DC in kuhva lakluh khap dawn

Champhai District Bawrhsap, Maria CT. Zuali chuan zanin zanlai atanga Indo-Myanmar Border Trade Point, Zokhawthar pehhel a kuhva lakluh khapna thupek a chhuah a, Indo-Myanmar Border Trade Point, Zokhawthar bakah hian Champhai District chhungah ramri inkal-pawhna kawng 10 chuang a awm a, heng atanga dan lova bungrua te lakluh hian kawng hrang hrangah harsatna a thlen thin a ni.


Central YMA in ngenna siam

Central YMA chuan thuchhuah siamin Mizo-ram hmun hrang hrangah inkalpawhna kawng siam hna thawh mek a ni tih sawiin, hei hian kan ram hmasawnna turah kawngro thui takin a su tih an sawi a. Inkalpawhna tha hian kan hun leh tha sen te titlemin, hlawk zawka hun hmang theiin min siam a, hmasawnna nasa tak min thlen thei tih sawiin, hetiang hre reng hian kawngpui tha kan neih theih nan thawhhona thuthlung siam a ni tih an sawi a. Belh-chiandawl leh tha taka kawngpuite siam a nih theih nan Sub-Hqrs/Group/Branch YMA-te chu an huamchhungah theihtawp chhuaha kawng siam hnathawhte lo vil vanga hma la turin an ngen bawk.


Thenzawl-ah Zu man tiral

Thenzawl Venghlun Branch YMA te chuan an Zu man sa litre 60 vel chu nimin khan an ti-ral. Thenzawl Venghlun Branch YMA hruaitute chuan heng Zu te hi mi pahnih hnen atanga an man a nih thu leh Thenzawl Containment Zone a puan anih hma leh hnu-a an man sa anih thu an sawi a, tualchhung rate a chhut in Rs. 18,000/- hu niin an sawi bawk. Thenzawl Venghlun Branch YMA te hian theihtawp chhuahin, hri leng darh tur venna kawnga hma an lak rualin, Zu do beihpui an thlak mek a, niminpiah khan a neitu hriat loh Zu an man chu Thenzawl Police te nen an lo leihbaw tawh bawk a ni.

Comments

Chhiar Hlawhte