MPCB hmalakna in Serchhip khawpui chhungah Boruak thianghlim dan enfiahna khawl bun a ni ta

Mizoram Pollution Contral Board (MPCB) hmalakna in Serchhip-ah boruak thianghlim leh thianghlim loh enfiahna khawl bun thar a ni ta a, Sample hmasa ber pawh lak ni tawhin naktuk ah result hriat theih beisei a ni.

Mizoram Pollution Control Board (MPCB) hmalakna hian Serchhip-ah hian boruak thianghlim leh thianghlim loh enfiahna khawl, Respirable Dust Sampler hi Inrinni khan bun thar niin a khawl pawh tihnun nghal a ni a, he khawl hmang hian chawlhkar tin vawi hnih zel Serchhip khawpui boruak thianghlim dan enfiah thin a ni dawn a ni. Respirable Dust Sampler dahna, Station hi Serchhip Bazar Building chhawng chungah leh Serchhip P&E Veng-a P&E Office bulah te dah a ni a, he khawl hian Nitrogen Dioxide (NO2) leh Sulphur Dioxide (SO2) bakah Parameter 10 (PM-10) an tih bawk hmanga Sample lain heng te hi Laboratory-ah enfiah leh tur a ni dawn tih thawktute chuan an sawi a, tunah hian Laboratory hi Serchhip Hmar Veng-ah mimal In luah-a kalpui phawt niin anmahni pual Office building nei turin hmalak nghal mek a nih thu an sawi bawk.

Serchhip-a boruak bawlhhlawh dan enfiah hna thawk tur hian MPCB chuan thawktu mi pahnih, Field Attendant ve ve (Vanlalkungi, Dinthar Veng leh Lalthazuali, Vengchung) an rawn dah a, heng mite hian chawlhkar tin tum hnih tal Sample la in hei hi an enfiah hnuah thuneitu sang zawk-ah an thil hmuhchhuah chu an thlen leh thin dawn a, Sample lak hi chi hnih niin pakhat zawkah hian darkar 6 danah sample la in pakhat zawkah hian darkar 4 danah sample lak a ni dawn bawk a ni.

Serchhip-a Field Attendant te chuan Aizawl lamah thla khat chhung vel hna an lo thawh tawh thu November thla chhunga Serchhip-a Sample lak hman ngei an duh avangin Inrinni khan an khawl hi an tinung tih an sawi a, an lo tawnhriat ve tawh atanga thlirin Serchhip boruak chu la thianghlim viau a an hriat thu pawh sawiin, Serchhip bakah hian Siaha, Lawngtlai leh Mamit-ah te pawh khawl hi bun thar a nih thu an sawi bawk.