Serchhip-ah ‘Anti-Drug Drive, 2020’ hawnna neiin SP in thuthar thehdarhtute a kawm bawk

India rampum-a tun thla ni 22 thlenga Police ten ‘Anti-Drug Drive, 2020’ an kalpui tur chu nimin khan Serchhip District-ah a hawnna neiin Serchhip SP, R. Sathiyasundaram IPS chuan tualchhung-a thuthar thehdarhtute a kawm nghal bawk.

Serchhip District-a ‘Anti-Drug Drive, 2020’ hawnna hun nimin chhun-a Serchhip SP Office Tual-a neih ah hian District Superintendent of Police, R. Sathiyasundaram IPS chuan ‘Anti-Drug Drive, 2020’ hi niminpiah, tun thla ni 15 atanga kalpui ni tawh mah se Serchhip-ah chuan hemi Ni hian Programme pawimawh a awm avangin he Drive hi kalpui a ni tawh chungin nimin-ah a hawnna hi neih a ni ta chauh tih a sawi a, he Drive hman chhunga hma lakna tur hrang hrangte sawiin, an hmalakna turah mipuite tawiawmna a ngen bawk a ni.

He hun hunah hian Addl. SP, PC. Laltanpuia chuan ‘Anti-Drug Drive, 2020’ hi Dec. 15 - 22, 2020 chhunga hman tura tih ni mah se tun thla tir lam atangin Serchhip District-ah chuan hemi zulzui hian hma an lo lak tawh thu leh Police Station leh Out-Post hrang hrangah hmalakna kalpui a nih tawh thu a sawi a. Hei bakah hian Placard te siamin ruihhlo zawrh leh hmansual thatlohna thuziak hrang hrang te Commercial Vehicle-ah tar a ni dawn tih sawiin, Dan bawhchhia ten an Dan bawhchiat ang hremna an hmuh theihna tura thubuai buaipui dan pawh inzirtirna pawh Police te tan an neih dawn thu leh theitawp chhuaha hmalakna an kalpui dawn thu a sawi bawk.

Nimin-a he hun hman zawh a nih hnu hian Serchhip SP hian a Office Chamber-ah Serchhip a tualchhung chanchinbu mite kawmin kan hma lawka hunpui lo thleng tur mipui ten him leh thla-muang taka an hman theihna tura inbuatsaihna te a sawipui a, he hunah hian SP chuan kumin chu hri leng avanga hun danglam bik a nih thu sawiin, hri leng avang hian Hunpui vuakvet-ah District Bawrhsap in puipunna reng reng huaihawt khapna a tihchhuah thu sawiin, he khapna hi theihtawp-a khauha kenkawh an tum thu a sawi a, chumi atan chuan Media-a thawktute chuan mipui zirtirna uar lehzualin kalpui se a duh thu pawh sawiin, hri leng laka himna tura sawrkar in kaihhruaina a siam hrang hrangte chu mipui te pawhin tha takin zawm se an duh thu a sawi bawk.

He hunah hian MJA Serchhip District President, Kapliana Pachuau chuan Serchhip Police te hmalakna hrang hrang fakawm a tih thu sawiin, an hnathawh dan ah leh mipuite an dawr danah pawh hmasawnna lawmawm tak a awm zel thu leh an hnathawk pawh hmuh a nawm thu a sawi a. Police ten mipuite himna tura hma an lakna ah thuthar thehdarhtu ten tangkaina an nei a nih chuan theihtawp chhuah an inhuam thu sawiin, MJA Serchhip District ten kumin a Krismas Charity Fund lakkhawm leh an tum ah an sum hmuh atanga zatve chu hri leng avanga mipuite himna tura theihtawp chhuaha thawk Police te tan hlan an tum thu a sawi bawk.

Serchhip SP chuan an hnathawh te MJA in an hriatpui leh chutianga ruahmanna an lo siam chu lawmawm a tih thu a sawi a, Hunpui laia hmalakna tura ruahmanna an siam hrang hrangte pawh a tarlang bawk a ni.

He hunah hian Serchhip SDPO, Kaste Romalsawma chuan mipuite himna kawnga hma an lakna tlangpui te tarlangin, tunhnaia khawchhak lam atanga lirthei rawn lut te enfiah hna an thawh thin bakah Serchhip khawpui chhungah tlaivar a hma an lakna te a sawi bawk a ni.

He inkawmna ah hian thuthar thehdarhtute chuan an ngaih pawimawh hrang hrangte sawiin, Serchhip Police te chuan engemaw thil tul avanga kawngpui-a hna thawk tur leh kawngpui danpin ngai a awmin Police hnena dil hmasak thin tur a nih thu an sawi a, thawhhona tha zawk neih zel dan turte pawh sawiho a ni bawk.