COVID-19 hri kai mi 9 hmuh belh leh an ni

/

Niminpiah-a Mizoram-a Sample enfiah atangin COVID-19 hri kai mi 9 hmuh belh leh an ni a, an zinga 6 te chu tualchhung-a hri inkaichhawng an ni.

Niminpiah khan ZMC Laboratory-ah Sample 583 enfiah niin heng atang hian COVID-19 hri kai mi 5 hmuh an ni a, an zinga mi 2 te chu tunhnaia State pawn atanga rawn lut niin midang pathum te hi tualchhung-a hri inkaichhawng an ni a, Sihphir Venghlun mi pahnih leh Edenthar Veng mi pakhat an ni. Niminpiah khan District hrang hranga TrueNat Laboratory-ah Sample 156 enfiah niin heng atang hian COVID-19 hri kai mi pakhat hmuhchhuah niin Lunglei District-a hmuhchhuah a ni a, BSF sipai tunhnaia Mizoram-a rawn lut a ni.

Niminpiah khan Rapid Antigen Test hmangin Sample 407 enfiah niin hri kai mi pathum hmuhchhuah an ni bawk a, an vai hian Lawngtlai District-a hri kai hmuhchhuah niin tualchhung-a hri inkaichhawng an ni.

Heti hian nimin tlai thleng khan Mizoram-a Sample enfiah zawng zawng chu 1,65,763 niin heng atang hian COVID-19 hri kai 4049 hmuh an ni tawh a, an zinga 3893 te chu enkawl dam ni tawhin tunah hian hri kai enkawllai 149 an la awm mek a, hri kai zingah nunna chan mi 7 an awm tawh bawk a, nimin khan mi 24 te chu enkawl dam leh an ni bawk.

India-ah COVID-19 hri kai nuai 99 an tling ta :

India rama COVID-19 hri kai hmuhchhuah chu nuai 99 an tling ta a, hri kai hmuhchhuah atanga za zela 95.12 te chu enkawl dam an ni tawh thung. Darkar 24 kalta chhung khan India ramah Sample 9,93,665 enfiah leh niin heng atang hian COVID-19 hri kai 22,065 hmuh belh leh an ni a, heng te nen hian tun thlenga India rama COVID-19 hri kai hmuhchhuah chu 99,06,165 an tling ta a ni. Darkar 24 kalta chhung khan India ramah COVID-19 hri kai 34,477 te chu enkawl dam leh niin tun thlenga hri kai enkawl dam chu 94,22,636 an tling tawh a, hei hi hri kai hmuhchhuah atangin zaa 95.12 niin tunah hian hri kai enkawllai 3,39,820 an la awm mek a ni. Darkar 24 kalta chhung khan India rama hri kai zingah nunna chan 354 awm lehin tun thlenga hri kai zinga nunna chan chu 1,43,709 an tling tawh bawk a ni.

Comments

Post a Comment

Popular News (Last 30 Days)

A hun pangngai ah Pavalai Intawhkhawmna neih tum a ni

/
Image
April 12-14, 2024 chhunga Mizoram pum huap Kohhran Pavalai Pawl Intawhkhawmna neihna tur East Lungdar tlang-a Pandal sak chu tukin zing-a thli tleh khan a tichhe vek a. Vawiin vek-a Organising Committee thutkhawm hmanhmawh neih chuan a hun pangngai a neih tumin Pathian chakna ringin inbuatsaihna kalpui nise an ti a. Naktuk (April 1, 2024) atangin Pandal chhia senghawi hna leh Pandal sak that hna chu a khawnat-a thawh nghal tum a nih thu East Lungdar Village Council President K. Lalngaizuala chuan LENKAWL a hrilh.
Kimchang zawkin »

LPG man bithliah thar a ni

/
Image
IOCL in Revised Retail Selling Price a tihchhuah angin Mizoram chhunga eirawngbawlna gas man chu bithliah thar leh a ni a, Vairengte tih loh Mizoram hmundang zawngah chuan LPG Domestic Cylinder kg. 14.2 a rit man chu bur khat Rs. 955/- niin kg. 19-a rit Commercial Cylinder chu Rs. 2224.50 leh kg. 19-a rit XtraTeJ chu Rs. 2247/- a ni anga, kg. 10 a rit Composit Cylinder chu Rs. 688.50 a ni bawk ang. Gas man hi Home Delivery kalpuina ah chuan bur khat ah Rs. 70/- aia tam lo belh tur a ni anga, Home Delivery kalpui thei nganglo Veng, Point delivery kalpuinaah chuan Rs. 7.53 zel belh tur a ni a. Godown-a hralh erawh chuan Rs.33.43 zel paih thung tur a ni.
Kimchang zawkin »