Latest News

SAM Programme hnuaiah naupang 11 enkawl mek

Ministry of Women and Child Development in India ram-a nu leh naupang hriselna atana eitur tha pek a kalpui mek, Poshan Abhiyan (National Nutrition Mission) hnuaia OPERATION Severe Acute Malnutrition (SAM) Programme atangin Serchhip ICDS Project hnuaiah naupang 11 enkawl mek an ni.

Poshan Abhiyan (National Nutrition Mission) hnuaia Operation SAM hi State Innovation Plan pakhat atan duan niin Mizo-ram chhunga nu leh naupang an lo hrisel zelna tur atana hmalakna pakhat a ni a, naupang taksa in a mamawh ang chawtha a hmuhloh hian taksa rihna leh san zawng khaikhin-a zang lutuk (Wasting) a neih phah thin a. Chu chuan taksa ti chaklo in, natna hrik doletna kawngah an taksa chakna tlahniamin, an hriselloh phah thin a. Enkawl vat an nih loh phei chuan thihna hial a thlen theih avangin hetiang dinhmun a awm naupang chu Severe Acute Malnutrition (SAM) tih an ni thin a ni.

SAM naupang enkawl mek te hi anmahni bialtu theuh Anganwadi Worker ten uluk taka vilin, Doctor-in damdawi a chawh te an ei that leh thatloh te an endik reng thin a, an rih zawng leh san zawng te hi thlatin an enfiah thin bakah Poshan Staff te hnenah thlatin naupang dinhmun thehlutin, anni hian a tul anga hma la in an lo bawh-zui thin a ni.

Operation SAM hian Anganwadi Centre-a naupang inziaklut zawng zawngte huamin Serchhip ICDS Project hnuaiah hian Serchhip leh a chhehvel khaw hrang hranga naupang 11 enkawllai an awm mek a, heng naupang te hi thla thum dan-ah naupang lam thiam bik Doctor, Pediatrician hnenah Special Clinic neih pui thin niin, hetah hian an damdawi man leh thildang senso tum sak vek thin an ni a. Operation SAM Programme hnuaia Serchhip ICDS Project in naupang a enkawl mek te hi an tha zelin, Severe atang Moderately Malnourished (MMN) ah an awm tawh a, enkawl zui zel tur an la ni ang.

Comments

Chhiar Hlawhte