Latest News

Chanchin thar thenkhat :

Tuizem sem tur vailiam

Agriculture Minister, C. Lalrinsanga chuan a bial chhung Tui harsat zualna khaw pathum-a sem tur Tuizem 130 chu nimin khan Buarpui PWD Bangalow atangin a vailiam a, heng Tuizem te hi Plastic tuizem litre 1000 dawng niin Serte khua ah 50, Sertlangpui khua ah 60 leh Kawl-hawk khua ah 20 sem tur niin MLA Fund atanga lei a ni. heng Tuizem vailiamna puala inkhawm ah Agriculture Minister chuan Mizoram Agriculture Sector ti hmasawn tur leh kuthna-thawktute dinhmun chawikang turin Department chuan theihtawp a chhuah chhunzawm zel dawn tih sawiin, sawrkar laipui Van Dhan Mission kaltlangin tunhnaiah cheng vbc. 17 an dawn belh leh thu a sawi a, hei hi Mizoram hmun hrang hranga kuthnathawktute tharchhuah leisak nana hman anih tur thu a sawi bawk.


Ruihtheih thil man tiral

Law & Judicial Minister, TJ. Lalnuntluanga hovin nimin khan Champhai-ah Champhai District Drugs Disposal Committee buatsaihin  ruihtheih thil bakah Sava vehna atana hman Silai (Airgun) halralna leh tihchhiatna hun hman a ni a, he hunah hian Police ten an man ruihtheih thil chi hrang hrang case kallai Rs. 22,02,000/- hu te; District Court atanga tihral phalna awm tawh Heroin leh Ganja Rs 1,70,72,300/- hu te, Drugs & Cosmetics Act hnuaia man khuh dam-dawi bur 17 leh District Magistrate man Sava vehna Airgun pathum te an ni.


MSCU thutkhawm neih a ni

Mizoram State Cooperative Union (MS-CU) Board of Directors chu nimin khan RCS Meeting Hall, Aizawl-ah an Chairman, K. Lalchamreia hovin an thukhawm a, he hunah hian Cooperative Societies-te inkaihhruaina Dan Bu-a Bye-law ennawn ngaite ennawn niin siam-that ngaite thlirho a ni a, siamthat (amendment) ngaite chu General Assembly chauhin a pass theih avangin Assembly neih hmasak berah chhawp-chhuah nise an ti.


Home Minister in ramri tlawh

Home Minister, Lalchamliana chuan nimin khan Mamit District chhunga Assam leh Mizoram inrina-a Sipai duty-na hmun, Thinghlun leh Medili a tlawh a, Krismas chibai buk nan pawisafai leh Silpauline a hlan bawk. Heng hmun a tlawhna ah hian Home Minister chuan ramri buaina avangin kan Sipaite chuan Krismas leh Kumthar pawh chhungte bulah hmang thei lovin ramri-ah an duty a ngaih thu a sawi a. Ramri-te uluk taka venhim a pawimawh thu sawiin, khawtlang hruaitute'n mamawh an thlente Sawrkarin a tul anga hma a lak tur thu a sawi bawk. Home Minister hian Kan-hmun-a COVID-19 Screening Point a tlawh nghal bawk.


Thenzawl tan chawhmeh pe

Serchhip District chhunga awm, Zote South khua chuan an thlai thar neih ang ang thawh-khawmin hri leng avanga Containment Zone-a puan mek, Thenzawl VLTF te hnenah nizan hmasa khan chawhmeh chi hrang hrang an hlan a, nimin khan Thenzawl Town Task Force te chuan YMA Branch hrang hrangah semin, YMA Branch te hian an huamchhunga pek awm nia an hriat chhungkaw thahnem tak hnenah an sem chhuak ve leh nghal a ni.  Thenzawl khua hi hri leng vangin Containment Zone-ah puan mek ala ni a, inkaihhruaina tlem-a thlahdul hretin mipui ten nunphung pangngai an zawm theih nan ruahmanna siama hmalak mek a ni bawk.

Comments

Chhiar Hlawhte