Rubber chingtute hnenah Rubber Rolling Machine hlan

Land Resources, Soil & Water Conservation Department changtu Minister, R. Lalzirliana chuan nimin khan Aizawl District-a Rubber chingtu chhungkaw 90 hnenah Rubber sawngbawlna khawl, 'Rubber Rolling Machine' leh a kaihhnawih hmanraw dang a semchhuak.

LR,S&WC Department in subsidy kaltlanga heng bungrua an semchhuahna hunah hian Minister, R. Lalzirliana chuan Mizo ten rubber kan hmelhriatna hi rei tawh hle mahse a chi tha kan chin loh avangte leh enkawl dan ang tur taka enkawl kan thiamloh avangte in a hlawk lova. Mahse Department in hmangchang hriain tunlai thiamna leh a chin dan turte zirchianga an buaipui hnuah chuan rubber hi eizawnna tlak a ni tih kan hre tan a, a chingtute pawh an pung chho mek a. Chuvangin Sawrkar chuan anmahni tan khawl leh a ur na In, 'Smoke House' sakna tur te a ngaihtuah sak ta a ni, a ti.

Minister chuan Sawrkar atanga tanpuina dawnga rubber ching chhungkaw 2927 an awm laiin Sawrkar puihnaa innghat lova mahni kutkawiha rubber buaipui chhungkua an tam zawk tih pawh sawiin, entawntlak a tih thu a sawi a. Mizorama rubber sawrchhuah chu Tripura aiin a tha nia mithiamten an sawi chu a lawmawm a tih thu a sawi. Hei bakah hian SEDP Pilot Project kaltlangin Kuhva chingtu thlanchhuah chhungkaw 200 hnenah huan samna tur Rs. 25,000 theuh pek tum a nih thu te, Rubber chin lama hmalakna atan NABARD atangin cheng nuai 680 hmuh anih thu te a sawi a. COVID-19 hripui lengin zia lam a pan hunah Department in theihtawp a chhuah tur thu a sawi bawk.

Aizawl District huamchhung – Thingsul, Saitual, Sakawrdai, Khawruhlian, Hmunnghak leh khaw dang engemaw zata chhungkaw 90 hnenah Rubber Rolling machine leh a chhawm tel bungrua te hi pek a ni a. Khawl man hi beneficiary tinin Rs. 10,000 in an dolet ve a ni.