Latest News

Health Minister-in Aizawl Civil Hospital building tlawhin hmalakna tur a enfiah

Health Minister Dr. R. Lalthangliana chuan nimin zing khan Aizawl Hospital Main Building, Blood Bank Building leh Trauma Centre sakna tur te chu a hmunah kalin a enfiah.

Civil Hospital Aizawl a tlawhna ah hian Health Minister, Dr. R. Lalthangliana chuan Aizawl Civil Hospital chu Mizoram-a sawrkar Hospital lian ber niin Mizoram hmun tin atanga damloten an pankhawm thin anih avangin theih ang tawk tawka enkawl uluk leh ngaihven a tul tih a sawi a. A Building pui ber hi kum 30 kalta hmalama sak a nih avangin a hlui tawh tih sawiin, damlote tan leh mipui tan pawh a him lovin a hlauhawm tawh hle in a hriat tih sawiin, Aizawl khawpui lunlai bera awm a nih bawk avangin tunlai design thar ang bera thuamthat leh sak that a tul tawh hle a, helai hmunhma hi a pun belh theih tawh si lo a, a hmunhma awmsa tangkai lehttha thei ang bera hman hi kan tih tur a ni, a ti.

Health Minister chuan TRAUMA Centre sakna tur leh Block-B Blood Bank leh Lab. PMR pawh tlawhin, TRAUMA Centre building sakna tur pawisa awmsa a nih avangin a hmanhmawh thei ang bera hmalak a tul tih a sawi a, karleh chhungin hemi chungchangah hian Committee ko nghal turin thuneitute a hrilh a. Aizawl Civil Hospital-a Cabin hlui 12 awm mek chu cheithat a tul tih sawiin, sawrkar sum leh RKS sum hmang kher lo pawhin Minister, MLA bakah a duh apiangin an chhungte hriatreng nan emaw, anmahni hming chawiin emaw cheng nuai 2/3 sengin thawmthat theih a ni, a ti a. A sponsor tute hming emaw, an sponsor chhan emaw tarlan sakin ruahmanna siam a theih dawn thu a sawi bawk.

Health Department hotute chuan Hospital Building chu Quality Control lamin an test tawh thu te, Hospital luh dawn zarhliap chu Steel Structure duang mekin tihthat thuai a nih tur thute Minister hi an lo hrilh a. TRAUMA Centre sak hna pawh thawh tan mai tuma an intintuah laiin remchang takin Smart City Project hnuaiah khung a ni a, a satu turte nen a Drawing thar duan leh anih thu sawiin, AMC lamah pawh an thehluh tawh thu Minister hi an hrilh a. Cheng Vbc. 10 chuang a sak tur TRAUMA Centre hi a hnuaiah Parking Lot zau tak a awm theih dawn thu leh chhawng 6 vela sanga sak thuai a nih tur thu an sawi a. Heng bakah hian a hmuna an en atanga siamthat ngai lai leh cheithat ngaite an sawiho bawk a ni.

Aizawl Civil Hospital tlawhtu Health Minister hi Health & Family Welfare Board Vice Chairman, Dr. ZR. Thiamsanga leh sawrkar mi pawimawh thenkhat ten an tawiawm a, Hospital Medical Supetintendent, Dr. Lalhmuchhuaka chuan mamawh hrang hrang an neihte leh Hospital dinhmunte Minister hnenah hian a lo thlen bawk a ni.

Comments

Chhiar Hlawhte