Rualbanlote pawl in khawlai an thianfai

Nimin December 3, 2020 kha khawvel pumah rualbanlote ni, International Day of Disabled Persons a ni a, Serchhip-ah chuan he Ni pual hian rualbanlote leh anmahni enkawltute chuan an remchan angin hun an hmang a ni.

Nimin-a International Day of Disabled Persons pual hian Zoram Entu Pawl (ZEP) chuan punkhawmna neih a remchan loh avangin an hnuaia Disabled People's Organizations (DPO) te chu anmahni huamchhung theuh ah a remchan anga hun hmang turin an ti a, Serchhip Chanmari Veng VC leh Serchhip-VII VC huamtu Beiseina Eng DPO chuan nimin khan an huamchhunga vantlang kawngpui thenfai hna thawkin Serchhip Chanmari Veng atanga Leisang Veng leh Bazar atanga Chanmari Veng kawngpui kam-a bawlhhlawh te an chharfai a ni.

Beiseina Eng DPO hnuaiah hian member mi 43 an awm tih an President, Mary Lalnunmawii chuan sawiin, kumdang ah chuan he Ni hi Block Level-ah te urhsun taka an hman thin thu leh kumin ah erawh hri leng avanga punkhawm a remchan loh avangin anmani remchan anga hmang tura tih an nih anga hetiang hun hi hmang an nih thu a sawi a. Rualbanlote chuan midangte tih ang zawng zawng ti theilo mah se kawng tam takah midang te angin thil an ti ve thei a ni tih hriaa faina kawngah pawh hma latu pawimawh an ni thei tih lantirna pakhat atan he hnatlang hi an neih thu a sawi bawk.