Latest News

North Vanlaiphai VC thlanna neih kal zelah mipui ten Dec. 10-ah Vote an thlak tha leh dawn

Serchhip District chhunga North Vanlaiphai Village Council inthlanna neih zawh taka lungawilohna SEC-a thlente ngaihtuah a nih hnuin State Election Commission chuan tun thla ni 10-ah Vote thlak tha turin ruahmanna a siam a, hemi atan hian nimin khan hriattirna pawh tihchhuah a ni.

Kumin August 27-a Mizoram District 9-a Village Council inthlanna neih ruala inthlang, North Vanlaiphai Village Council-ah hian inthlanna neih zawh a nih hnuah he inthlanna a tlinglo ZPM Candidate 4, Independent Candidate 4 leh INC Candidate pakhat bakah ZPM Agent 3, Independent Agent pahnih leh INC Agent pakhat, an vaiin mi 15 te chuan State Election Commission-ah an lungawilohna te thlenin he inthlanna a Vote tla te hi chhiar that an phut a. He an phut ang hian Nov. 18, 2020 khan Election Tribunal te kaihhruaina hnuaiah he inthlanna a Vote tla te hi chhiar that niin amaherawh chu he inthlanna a Vote tla te hi chhiar tur a awm kim tawh lova, hei vang hian Election Tribunal chuan Nov. 20, 2020 khan an thil hmuh dan chu State Election Commission-ah thehlutin Election Tribunal hian inthlanna neih zawh tak chu ‘rintlakloh’ a tih avang leh Election Tribunal thutlukna hi Dan-ah thutawp a nih avangin State Election Commission chuan mipuite tan Vote thlak thatna hun a ruahman leh ta a ni.

State Election Commission (SEC) Mizoram-a Secretary, Teresy Vanlalhruaii chuan North Vanlaiphai VC-ah hian mipuite chuan tun thla ni 10 khian Vote an thlak tha leh dawn tih sawiin, amaherawh chu inthlan thatna ni lovin Vote thlak that (Re-Poll) a nih thu leh Candidate pawh a thar siam lovin a hma ami rin tur an nih thu a sawi a. SEC in thuchhuah siama a tarlan danin Dec. 10, 2020 zinga dar 7:00 atang tlai dar 4:00 thlengin mipute tan Vote thlakna hun hawn a ni anga, Vote thlak zawhfel a nih veleh Vote tla te hi chhiar nghal tur a ni dawn a, engemaw avanga Vote thlak that ngai leh a awm a nih chuan a tuk, Dec. 11, 2020-ah Vote thlak leh a ni ang.

Hetihlai hian North Vanlaiphai VC in-thlanna neih zawh taka lungawilohna thlentute zinga pakhat chuan he inthlanna neih takah thil diklo thleng ah a kaikuang-a man lova hetia tih ngawt chu mipui lamin anmahni an hmuh dan a diklo thei tih sawiin, hemi chungchang hi Aizawl lamah Party Hqrs. lamah pawh thlenin thil tisualtu manchhuak ngei phawt tura an thlen tawh thu a sawi a. An hmalak zuina erawh an la hriat loh thu nimin tlai khan kan Palai hnenah a sawi thung.

Comments

Chhiar Hlawhte