Latest News

Thenzawl-ah hri danna pe tan; ni 2 chhungin mi 306 te hri danna pe tawh

Serchhip District-a COVID-19 Vaccine pek mekah nimin khan Thenzawl CHC-ah hri danna hi pek tan ve leh a ni a, he hun hi Thenzawl SDO (C), Kulothungan A, IAS chuan hmanpuiin sawrkar ruahman anga Vaccine lak runpui India ramah kalpui a ni leh Thenzawl-ah pawh kalpui theih a ni chu lawmawm a tih thu sawiin, Vaccine chuan mipui himna a thlen ngei a beisei thu a sawi.

Ramhnim atanga thil siamchhuah chi hrang hrang chhinchhiahna tur Health Minister in a tlangzarh

State Medicinal Plants Board (SMPB), Mizoram bultuma buatsaih Ramhnim atanga thil siamchhuah chi hrang hrang chhinchhiahna tur, 'ZOMEDPLANTS' chu nimin khan Health Minister Dr. R. Lalthangliana chuan a tlangzarh a, SMPB Official Website pawh nimin vek khan tlangzarh a ni bawk.

Nimin a SAD Conference Hall, Aizawl-a tlangzarh tak 'ZOMEDPLANTS' hi State Medicinal Plants Board bultumin, Angel Business Promoters-te nen tangkawpa buatsaih a ni a, ramhnim atanga thil chi hrang hrang siamchhuah chhinchhiahna tur (brand name) a ni a. Ramhnim damdawi atanga ei leh in mai theih tur siamchhuahte 'ZOMEDPLANTS' hming hian mipuite lei theih turin zawrhchhuah a ni dawn a. Nimin-a tlangzarh inkhawmah hian 'ZOMEDPLANTS' product hmasa ber Mizo Sunhlu (dry candy) leh Detox Tea chu chhawpchhuah a ni bawk.

'ZOMEDPLANTS' tlangzarhna hunah hian Health Minister, Dr. R. Lalthangliana chuan Mizoram-a ramhnim kan neih te zirchianga 'ZOMEDPLANTS' kaltlanga mihringte tana hrisel tur thil chi hrang hrang siamchhuahna tur ruahmanna chuan Mizoram tan a tha zawngin thil thar a thlen ngei ang tih a rin thu a sawi a. COVID-19 vangin thalai tam tak phai lama an hna thawk chhunzawm thei lovin an lo haw tih pawh sawiin, anni tan pawh hmalakna remchang leh entrepreneurship lama min ti thangharh lehzualtu ni ngei se a duh thu a sawi a. Pathian in thei leh ramhnim hmanga malsawmna tam tak kan rama min pek chu a tangkaina kan phawk chhuak thei a nih ngat chuan nasa lehzualin min petu hian malsawmna in min vur belhchhah ngei ang, a ti bawk.

Nimin vek khan Health Services Director, Dr. H. Lalchungnunga chuan State Medicinal Plants Board Official website siam thar, www.smpbmizoram.com chu a tlangzarh bawk a. He website hi State Medicinal Plants Board chung-chang leh a hmalakna hrang hrangte awlsam zawka en theihna tur a ni.

State Medicinal Plants Board, Mizoram hi National Medicinal Plants Board, Ministry of AYUSH hnuaia din niin, Directorate of AYUSH Govt. of Mizoram hnuaiah a awm a ni.

Comments

Chhiar Hlawhte