Latest News

Meizu mi 6 man leh an ni

Serchhip District Anti-Tobacco Squad te chuan Inrinni zing khan Serchhip Bazar building leh a chhehvel bakah Taxi leh Auto Rickshaw Stand-ah te Squad Drive an nei leh a, heng hmun an tlawhna ah hian Sikret leh Vaihlo kaihhnawih khuahkhirhna Dan bawhchhia a puipunna leh vantlang hmun-a meizu mi 6 an man leh a, heng mite hi pawisa chawitir nghal an ni.

KVK N. Vanlaiphai-ah 'World Soil Day' hmang

Inrinni kalta December 5, 2020 khan khawvel pumah 'World Soil Day' hman a ni a, Serchhip District-a Krishi Vigyan Kendra (KVK), North Vanlaiphai-ah pawh he ni pual hian hun hman a ni.

KVK North Vanlaiphai Training Hall-a 'World Soil Day' puala hun hman hi KVK North Vanlaiphai-a SMS (Agri. Engineering), R. Lalchhandami chuan kaihruaiin AMFU North Vanlaiphai Sub-Division President, F. Lalnghilhlova chuan Khuallian niin hun a hmanpui a, khuallian chuan Soil Test lamah tun aia uar lehzual-a hma la tur in KVK-te a sawm a. Loneitute chu an hnathawh kawngah taima tak leh rinawm taka thawk tur leh KVK chu tangkai taka hmang turin a sawm bawk a, AMFU chu KVK nena thawkho tura an inpeih reng thu a sawi bawk.

Kumin-a 'World Soil Day' ah hian ‘Keep soil alive, protect soil biodiversity’ tih chu thupui ah hman niin he thupui hmang hian Kenny Zohmingliana, SMS (Agronomy) chuan thu a sawi a, leilung venhim leh leilung hausakna vawnhim that a pawimawhna te a lem nen entir in a tarlang bawk.

Chawhnu lamah Training Programme hman chhunzawm niin Lalnunzawma, Farm Manager leh Jeffrey Lalhmingmuana, Programme Assistant (Agri. Extension) ten Soil Test leh Soil Management chungchangah te zirtirna neiin loneitute nena inkawmhona an nei nghal a. Abisag Lalremruatpuii, SRF (NICRA) in ‘Rabi Awareness Campaign’ a nei nghal bawk. He hunah hian N. Vanlaiphai khuaa loneitu mi 30 vel telin, Soil Health Card semchhuah nghal a ni bawk.

Comments

Chhiar Hlawhte