Latest News

AMC inthlanna neih theih a nih hmaa AMC enkawltu atan sawrkar in Administrator a ruat

Aizawl Municipal Corporation (AMC) dinglai term chu a tawp dawn tak avangin AMC a Municipal Commissioner hna chelh mektu, K. Laldingliana chu Administrator atana Sawrkarin a ruat.

He thu hi nimin khan Urban Development & Poverty Alleviation changtu Deputy Chief Minister, Tawnluia chuan CS Conference Room, Aizawl-ah a puang a, Deputy Chief Minister chuan AMC Board of Councillors thlan chu COVID-19 hripuiin min la chenchilh zel nia a lan avangin State Election Commission chuan a hun taka inthlanna an buatsaih thei dawn lo tiin thu an thlen thu a sawi a. Hripui len avangin Local Council leh Village Council te pawh a hunah inthlanna buatsaih theih a nih loh avangin tum hnih lai Sawrkarin an hun a pawtsei a, he inthlanna hi thla 4 lai a khawtlai hnuin August ni 27 ah inthlanna chu neih a ni a, Mahse hripui vang bawkin Aizawl khawpuia Veng engemawzat ah a hun ruatah inthlanna hi kalpui thei a ni lovin, September thla ah an inthlang ta a ni, a ti a .Hetiang hi thil anih avangin leh tunah AMC dinglai mek hun term chu December ni 9, 2020 zanlai-ah a tawp mai dawn avangin ruahmanna siam a tul ta niin a sawi a. Aizawl Municipal Corporation (AMC) a Municipal Commissioner hna chelh mektu, K. Laldingliana chu AMC inthlanna kalpui theih anih hma chuan AMC enkawltu, Administrator atana Sawrkarin a ruat thu a puang a ni.

Deputy Chief Minister chuan sawrkar in he thil hi uluk tak a ngaituah thu sawiin, India rama Municipality dan hrang hrang an zirchianaah hun pawhsei hi a la awm ngai lova, an term a zawh hnua inthlan a theih loh pawhin Administrator emaw, Board of Administrators ruat an lo ni thin tih a sawi a. Hetiang dan hi The Mizoram Municipalities Act, 2007 hnuaiah pawh kan neih thu leh hetiang a nih tak avangin he Dan Section 13(6) in State Sawrkar thuneihna a pek angin ‘Adminstrator’ ruat a lo tul ta tih a sawi a. Sawrkar in uluk taka a ngaituah hnu in AMC a Municipal Commissioner hna chelh mek K. Laldingliana chu Adminstrator a ruat nise tiin thlulukna Sawrkarin a siam tih a sawi a. Inthlan kalpui theih anih hma chu Administrator niin AMC a enkawl tur thu a sawi bawk.

Comments

Chhiar Hlawhte