Latest News

Meizu mi 6 man leh an ni

Serchhip District Anti-Tobacco Squad te chuan Inrinni zing khan Serchhip Bazar building leh a chhehvel bakah Taxi leh Auto Rickshaw Stand-ah te Squad Drive an nei leh a, heng hmun an tlawhna ah hian Sikret leh Vaihlo kaihhnawih khuahkhirhna Dan bawhchhia a puipunna leh vantlang hmun-a meizu mi 6 an man leh a, heng mite hi pawisa chawitir nghal an ni.

Oil Palm hralhna-ah sawrkar in Support Price Kg. 1 zelah Rs. 4.50 a pe tawh dawn

Mizoram sawrkar chuan Mizoram-a Oil Palm chin chu tuaithar a tum mek a, hemi atana hmalakna pakhat atan Oil Palm chingtu ten tuna an tharchhuah an hralhna bakah Kg. khat zelah Support Price Rs. 4.50 zel a pe dawn a, he ruahmanna hian Oil Palm chingtute tan phurna a siam an rin thu Serchhip-a Oil Palm chingtute chuan an sawi.

He thu hi nimin khan Serchhip District Agriculture Officer leh Serchhip District Oil Palm Zonal Committee-a Member Secretary ni bawk, C. Lalnithanga chuan Serchhip Press Club-ah thuthar thehdarhtute kawmin a sawi a, Serchhip DAO chuan nimin khan Agriculture Minister C. Lalrinsanga leh Mizoram State Planning Board Vice Chairman H.Rammawi te chuan Video Conference hmangin Mizoram-a Oil Palm chinna District- Kolasib, Mamit, Lunglei leh Serchhip District-a Oil Palm Growers Association hruaitute leh DAO te hnenah an puang tih a sawi a. Mizoram-a Oil Palm chingtute chuan Oil Palm rah, Fresh Fruit Bunch (FFB) chu Kg. khat Rs. 5.50 zela Godrej Agrovet Private Limited leh Ruchi Soya Industries Ltd te hnena an hralh chu Oil Palm chingtuten hlawk zawka an hralha Mizorama Oil Palm chinin hma a lo sawn zel theihna tur leh Prime Minister, Narendra Modi-a’n India hmarchhakah uar lehzuala Oil Palm chin a nih theih nana a hmalakna kal zel tihhlawhtlinna ni pahfawmin Oil Palm chingtuten a rah an hralhna ah Kg. 1 zelah Support Price Rs. 4.50 zel a pe dawn tih a sawi a, hei hi India rama Commission for Agriculture Costs & Prices (CACP)-in Oil Palm atana Minimum Support Price atan Metric Ton khata Rs. 10,035/- a recommend zulzuia ruahman a nih thu leh hemi bakah hian sum tam tak senga Oil Palm rah hmin tha leia, Mizoram-a a hriak sawrna khawl buna hertu Godrej Agrovet Private Limited te tihphur thar nan Kg. 1 an buaipuinaah Re. 1.00 zelin a pui dawn bawk tih sawiin, kumthar atanga hman tur a nih thu a sawi bawk.

Serchhip DAO chuan Oil Palm chu Ser-chhip District-ah pawh khaw 12-a loneitu mi 354 in Hectare 740 vela zau-ah an ching tawh tih sawiin, tun thlengin kung 1,05,844 an chin tawh thu a sawi a, Oil Palm chinna area hi tihzauh theih a nih tawh loh avangin a awmsa te tuaithar-a nasa zawka enlawl tum a nih thu a sawi a. Kumin hian Oil Palm quintal 871.4 vel lei a nih tawh thu pawh sawiin, amaherawh chu Oil Palm chingtu zinga tlemte chauhin an la hralh avangin hetianga sawrkar in Support Price a siam sak chuan Oil Palm tharchhuah pawh a pun ngei a beisei thu a sawi bawk.

He hunah hian Serchhip District Oil Palm Zonal Committee Chairman, Lalchhuanawma Siakeng pawhin kum 2008 vel atangin Serchhip District-ah Oil Palm an chin thu sawiin, Serchhip District tana Company ruat, 3F Oil Palm Agro-tech Pvt. Ltd. te chu an inhnuhdawh avanga harsatna an tawh thu a sawi a, amaherawh chu sawrkar in Bukvannei-a an hralhna tur a tum sak avangin tluang taka an hralh zui theih thu leh kumin ah cheng nuai 13 chuang man an hralh tawh thu a sawi bawk.

Oil Palm Zonal Committee Chairman chuan Oil Palm te hi Company lam hian kawngpui-a phurhchhuah chin ah an laksak avangin kawng-pui thleng phurchhuak tura harsatna an tawh thin thu pawh sawiin, hei vang hian Oil Palm chingtu tam tak chuan an hralhchhuah theihloh phah niin a sawi a, sawrkar in hetianga Support Price a siam sak tak avang hian Oil Palm hralh duh an tam bakah an tharchhuah te pawh a pun ngei a beisei thu a sawi a, Oil Palm te hi kum khat-ah vawi thum te a rah an seng theih thu pawh a sawi bawk.

Sawrkar laipuiin Special Assistance for States for Capital Expenditure hnuaia State hrang hrangte sum hman tur a ruahman zingah Mizoram Sawrkar chuan Oil Palm chingtute puihna tur leh Oil Palm rah leia a hriak sawrtute tihphurna turin cheng vbc. 2.49 a ruahman a ni.

Comments

Chhiar Hlawhte