Serchhip-ah Mizoram MP pahnih te hovin sawrkar hmalakna thlirhona hun hman a ni

Serchhip District chhunga Central sawrkar sum hmanga hmasawnna hnathawh hrang hrangte thlirin nimin khan Serchhip District Development Co-ordination and Monitoring Committee (DISHA) chu an thukhawm.

Kar hmasa lama DISHA thutkhawm neih ah rokhawlhna a awm avanga zawhfel theih a nih loh hnua DISHA thutkhawm hi Serchhip DC Meeting Hall-ah neih niin DISHA Chairman leh Lok Sabha MP, C. Lalrosanga chuan thutkhawm a kaihruai a, Lok Sabha MP chuan India rama inthlanpui neih a nih avang leh hripui leng avangin DISHA thutkhawm chu a hun taka neih theih a nih loh hnuah thutkhawm neih leh thei a ni ta chu lawmawm a tih thu a sawi a. Co-Chairman Rajya Sabha MP, K. Vanlalvena pawhin sawrkarna inthlakin, roreltu party chu lo danglam thin mahse engtiklai pawha ram tana dinhmun pawimawh chelh tlat reng tute chu sawrkar hnathawkte an ni tih sawiin, an thahnemngaihna chuan ram a chawikang zel thin a ni, a ti a. Ram tana theihtawp chhuah zel tura chahin Central lama bawhzui chi Project an neih te chu inthlahrung lova hrilh tur leh, an theihna zawn zawnah an lo umzui tur thu a sawi bawk.

He thutkhawm ah hian District Bawrhsap leh Member Secretary, Kumar Abhishek chuan Meeting sawihawnna neiin Serchhip DRDA Project Director leh DISHA Charge Officer, Malsawmtluanga ckaihhruaina hnuaiah Department hrang hrangten tun sawrkar kum kal meka Central Scheme an thawh hrang hrangte an tarlang a. He huna tarlan a nih danin Tun sawrkar kum kal mekah MGNREGA atangin ni 82 inhlawh tawh a ni a, ni 100 inhlawhna a awm ngei tura beisei a ni. Thingtlang mirethei In sak tanpuina, PMAY (G) chu kum 2016 atangin Serchhip District-ah mi 100 pek an ni tawh a. An zinga 88 chuan sa zovin an luah tawh a ni. National Rural Livelihood Missions hnuaiah tunhnaiah Lungchhuan-ah Hmarcha sawngbawlna bun thar a ni a, Leng-ah Aieng herna dah niin Hmuntha, Khawbel leh Hualtu-ah Alu chin tum mek a ni.

District chhungah PMGSY sum hmangin khaw kar kawng 10 thawh mek a ni a, heng zinga a tam zawk hi thawh zawh thawkhat tawh an ni a. Thingtlang khuate tana tuilak hnathawhna, Jal Jeevan Mission hnuaiah 2019-20 Financial Year-ah khaw 16 tan tuilak hnathawh a ni a, an zinga 10 hi zawh tawh niin a dang te pawh zawh thuai beisei a ni a, kum 2020-21 ah hian khaw dang 7 ah hetiang hmalakna bawk hi thawh zui nghal tur a ni. Swach Bharat Mission (Rural) hmalakna ah Serchhip chu India ram puma District titha 10 thlanchhuah zingah a tel a, tunah hian chung zinga a titha zual result chu nghah mek a, kum 2019 khan Swachh Survekshan-ah India ram State te (small state) leh UT Category-ah pahnihna an dawng bawk a. World Toilet Day Award, 2020 lawmman a dawng bawk. Kum kal mekah naupiang 220 chhinchhiah tawh an ni a, an zinga 2 hi an boral a, naupang kum 5 hnuai lam boral 2 an awm bawk.