Latest News

BDO ram laihchhiat chungchang hi

BDO ram laihchhiat chungchang hi

- Zonuna Kawlni

Tunhnai khan RD changtu Minister, Lalruatkima chuan Serchhip rawn tlawhin Serchhip P&E Veng-a a Department chan, RD ram laih tak leh helai hmun-a Staff Quarters awm thin te thiah a nih hnua Staff Quarters sak mek te a tlawh bawk a. Leisekawt Field laih zauh vanga BDO Quarters leh a chhehvela Rataining Wall siam ngaite enin, retaining wall hi tun Thal chhung ngeia siam tha a tih thu leh, Field zauh nana laihzawl thar pawh tha taka hunga awmze neia hman tangkai tha a tih thu a sawi a. Hemi hmalam-a helai hmun a tlawh tum hian kawngpui awmsa kam chin-ah Side Drain siam tul a tih thu pawh sawi tawhin hei hi tha taka siam a ni tawh bawk a ni.

Kan hriat angin tuna Leisekawt Mual/Field tia kan hriat, Field No. II kan tih thin hi Serchhip mipui ten kan Field hman nasat ber thin a ni a, amaherawh chu duh anga a zauh tawkloh avang leh Field dang kan neih tak avangin tunhnai chho ah erawh inkhelhna atan chuan kan hmang tam ta lo viau a, amaherawh chu a hmunhma awmna hi khawpui laili a nih avang leh mipui nawlpui tan pawha pan a awlsam avangin Serchhip mipuite chuan laihzauh kan duh viau thin a, sawrkar ram leh building tihchhiat a tul avang leh sum tam tak senna tur a nih bawk avangin hmalak theih a ni vaklo thung a, Serchhip khua in kumin-a KTP General Conference a dawn tur denchhena hmalakna lian tak awmah he mual hi laihzauh a ni ta hlauh a, mipuite an lawm viau laiin a ram neitu Department lam erawh an lawm vaklo tih erawh chu tlang hriat a tih theih awm e.

Amaherawh chu he Mual hi laihzauh a nih tirh ah tangkai taka hman nghal ni mah se a hnua hmalak zuina ah erawh mipui beisei kan hmu zui ta lemlo mek niin a lang a, kan khawtlang mi thenkhat ten tuna an hmalakna hi Phase-I a nih thu leh Phase-II hmabak la awm anga sawi te awm thin mah se tuna kan Minister in a rawn tlawha a thusawi atang hi chuan tuna kan laihzauh bak hi kan laih hmel tawh rihlo niin a ngaih theih a, mipui ten kan lo beisei Field zau zawk aiin Field penhlelh a mual siam belh, thildang-a hman tur kan neih belh hlek dawn chauh niin a lang a, kan sum sen tawh dan leh kan hman tangkai zuina tur hi a inphu dawn em tih pawh ngaihtuah tham a ni awm e.

Kan hriat angin BDO Office hi Serchhip in sawrkar Department kan neih hmasak te zing ami niin a tirah ram zau tak neiin sawrkar Department thenkhat te an sahthlak zel avangin an ram pawh a zim ta viau a, tuna laihzauh han sawi a nih pawh khan tul tihlohna tam tak a awm tawh a, amaherawh chu mual zau kan mamawhna avangin kan mamawhna in a ur thlu tih theih a ni awm e.

Chutiang a nih laia kan hmalakna chhunzawm tluantlin a nih hma leh mipui beisei ang a nih hmaa tawpsan mai tur anga ngaih theih a ni ta mai hi Serchhip khawtlang tan chuan a lawmawm loh hle mai a, sawrkar in hetianga mual laizau tura hma a lakna kha khawtlang hmasawnna tur ngaihtuah vang nge, Serchhip khua in KTP General Conference a dawn tur inbuatsaihna zawk tih pawh ngaihtuah theih tak a ni awm a. Chuvang chuan kan sawrkar in sum tam tak sengin hma a la ta sa sa, mipuite beisei ang Field puitling nei tur hian chak taka hmalak leh nise a duhawm hle mai a, chutiang ni lova khawmpui lian kan dawn denchhen chauha hma hi la leh mual hi laizau kan lo ni zawk a nih erawh chuan khawtlang leh mipui tan chuan a lawmawm loh thei hle awm e.

Comments

Chhiar Hlawhte