Latest News

Thenzawl-ah hri danna pe tan; ni 2 chhungin mi 306 te hri danna pe tawh

Serchhip District-a COVID-19 Vaccine pek mekah nimin khan Thenzawl CHC-ah hri danna hi pek tan ve leh a ni a, he hun hi Thenzawl SDO (C), Kulothungan A, IAS chuan hmanpuiin sawrkar ruahman anga Vaccine lak runpui India ramah kalpui a ni leh Thenzawl-ah pawh kalpui theih a ni chu lawmawm a tih thu sawiin, Vaccine chuan mipui himna a thlen ngei a beisei thu a sawi.

North Vanlaiphai VC-a Vote thlak tha turin inbuatsaihna ngawrh taka kalpui nghal a ni

North Vanlaiphai Village Council-ah tun thla ni 10-a mipui ten Vote an thlak that dawn avangin Model Code of Conducts puan nghal niin Vote thlak turin inbuatsaihna pawh ngawrh taka kalpui nghal a ni.

Kumin August 27-a North Vanlaiphai Village Council inthlanna a Vote tla te chhiar that a nih hnuah inthlanna a vote tla te pawm a nih loh avanga State Election Commission in tun thla ni 10-ah he Village Council-ah hian mipui te vote thlak tha tura a tih hnuah inbuatsaihna kalpui nghal a ni a. Vote thlak that tur puan a nih rual hian Election Model Code of Conduct chu hman tan nghal a ni tih Serchhip District Election Officer chuan thuchhuah siamin a tarlang a. He Model Code of Conduct hi North Vanlaiphai VC huamchhunga Political Party, Candidate-te leh Sawrkar hnathawk zawng zawngten zawm nghal tur a nih thu leh he Model Code of Conduct hi December ni 17, 2020 (Ningani) thleng kenkawh a ni ang tih a tarlang a. Serchhip DRDA Project Director, Malsawmtluanga kaihhruaina hnuaiah  District MCC Team pawh siam nghal a ni bawk.

Hei bakah hian VC Inthlan lo awm turah Inthlanna felfai leh thianghlim tak a awm theih nan Vote thlak hun khar (close of poll) a nih atanga chhiar leta darkar 48 (December ni 8, 2020 Thawhlehni tlai dar 4:00) hnulamah campaign phal a ni tawh lo tih a tarlang a. December 8, 2020 tlai dar 4:00 hnulamah North Vanlaiphai VC area chhunga campaign tura lut, North Vanlaiphai VC Roll chuang si lo te cham bang phal ni tawh lovin VC area an chhuahsan nge ngei tawh tur a ni tih a tarlang bawk.

Hetianga Vote thlak that tur puan a nih tak avang hian Election Department lam pawh ngawrh takin an inbuatsaih nghal a, Serchhip Election Officer, Vanlalhmachhuana chuan inthlanna buaipuitu tur hian a hma-a inthlan buaipuitute nilo ruat an nih dawn thu sawiin, tunah hian State Election Commission-ah rawtna thehlutin an thu ngaihchan mek a nih thu a sawi a. Tunah hian buaipui ngai ang ang te buaipui chho mekin inthlan buaipuitute tana Training hmasa ber pawh karleh Thawhtanni khian North Vanlaiphai hmun-ah neih tum a nih thu leh inthlanna felfai tak neih a nih theihna turin ruahmanna hrang hrangte siam a nih tawh thu a sawi bawk a ni.

Comments

Chhiar Hlawhte