Latest News

Mizoram-ah Lockdown puan tumna a awm rihlo

Tunhnaiah hunpui laiin Mizoram-ah hri leng avanga inkharkhip tumna a awm angin thu thang mah se harsatna kan tawk emaw, kan dinhmun a derthawng ta viau emaw a nih loh chuan ‘Lockdown’ tumna a awmlo.

Nimin khan Health Minister, Dr. R. Lalthangliana hovin SAD Conference Hall-ah Mizorama COVID-19 hri leng mek chungchang thlirhona neih niin Home Minister leh Medical Operational Team Chairman bakah Chief Secretary leh sawrkar mi pawimawh te an tel a. He thutkhawm ah hian thla hmasa-a Aizawl khawpui-a inkharkhipna kalpui a nih hnua COVID-19 hri kai an tlem dan thlirho niin, tun dinhmunah chuan inkharkhip puan khan awmzia a nei hle nia an hriat thu an sawi a. MoHFW in Nov. 2, 2020-a Mizoram-a hri kai kai zat tur an chhut lawk danah December ni 4, 2020-a mi 4363 ni tawh tura an chhut chu tunah hian mi 3888 hri kai an ni tih tarlan a ni a. Heng te hi thlirin tunhnaia inkharkhip puan leh tura thuthang awm chungchangah harsatna kan tawk emaw, kan dinhmun a derthawng ta viau emaw a nih loh chuan ‘Lockdown’ tumna a awm loh thu an tarlang a ni.

He hunah hian Medical Operational Team, Indian Medical Association (IMA) leh Mizoram Government Doctors' Association (MGDA) tangkawpin Aizawl Dawrpui Area zirchianna an neih report tarlan niin, mipui mimir veivak leh dawrkai ten Mask an vuah tha a, dawrkai ten sulhnu Mobile Application QR Code an tar bakah dawrtute chhinchhiahna tur register an dah bawk a, hetih rual hian dawr kawt-a thu/inpho te erawh chuan hetiang hi an ti lo tlangpui a ni.

COVID-19 hri kai, mahni In lama inenkawl (Home Isolation) te neih ngei ngei tur Home Care Kit - Digital Thermometer, Pulse Oximeter, N95 Mask, Gloves mamawh zat ang tawk, PPE Full kit 3 tal, Hand Sanitizer te chu Home Isolation a awm ten ngai pawimawh thin se an duh thu tarlan a ni a. COVID-19 helpline hmang tangkai turin mipuite an chah bawk a ni.

Lai Autonomous District Council inthlan neih mekah nimin khan vote thlak nimahse Election Process hi December ni 14 thleng a nih avangin sawrkarin theihtawp chhuahin a fimkhur tih he hunah hian tarlan a ni a. Election duty a kal leh LADC area a mipuite chu uluk taka mahni inchika fimkhur taka awm chhunzawm rih zel turin an chah bawk.

He thutkhawm ah hian COVID-19 dona kawnga sawrkar department hrang hrang thawhhona a that avangin lawmthu an sawi a, Kohhran leh NGO hrang hrangte bakah Volunteers te, Frontline Workers te chungah leh mipuite hnenah lawmthu an sawi bawk a, theihtawp kan chhuah tlanna in rah tha a chhuah a ni tih tarlangin, sawrkar thu zawma tang chhunzawm zel turin an ngen bawk.

Comments

Chhiar Hlawhte