Hri kai mi 3 enkawl dam

Serchhip District-a COVID-19 hri kai enkawl mi pathum te chu nimin khan anmahni enkawlna hmun atanga chhuahtir niin Serchhip District-ah hri kai enkawllai mi 22 an la awm.

Serchhip CMO Office atanga thu kan dawn danin nimin a hri kai enkawl dam tak te hi Bhartia Infra Project Limited hnuaia thawkte niin Nov. 12 khan Serchhip District rawn thlengin Nov. 21-ah COVID-19 hri an kai tih hmuhchhuah a ni a, an Sample enfiah nawn a nih hnuah hri lakah an fihlim avangin nimin khan anmahni enkawlna hmun, Nursing School CCC atanga chhuahtir an ni ta a ni.

Niminpiah leh nimin khan Serchhip District-a TrueNat Laboratory-ah Sample enfiah awm lovin Rapid Antigen Test hmangin Sample 13 enfiah a ni bawk a, heng atang hian hri kai hmuh thar an awmlo a ni. Nimin thlengin Serchhip District-a COVID-19 hri kai hmuhchhuah chu mi 159 an la ni a, an zinga mi 137 te chu enkawl dam ni tawhin tunah hian hri kai enkawllai 22 an la awm mek a, an vai hian Nursing School CCC-ah enkawl mek a ni. Serchhip District-ah hian hri leng avanga mahni In lama inkhunghrang mi 44 an la awm mek a, sawrkar hmunhmaa inkhunghrang mi 172 an la awm bawk a ni.