Latest News

Mizoram-a damdawi In fai thlanna neih a ni

Serchhip District in 3-na dinhmun a luah

National Health Mission (NHM) buatsaihin Mizoram-a damdawi In fai thlanchhuah te hnenah nimin khan lawmman hlan niin Health Minister, Dr. R. Lalthangliana chuan a hmanpui a, District Hospital fai ber atan Lawngtlai District Hospital thlan niin Serchhip District Hospital chuan lawmman pathumna a dawng a ni.

Taxation Conference Hall, Aizawl-a Kayakalp (Damdawi In Fai leh tha Lawmman/Award to Public Health Facilities) lawmman, LaQshya Certification leh National Health Mission hnuaia lawmman chi hrang hrang semna hunah hian Health Minister, Dr. R. Lalthangliana chuan fai leh thianghlim kawnga inelna hlawhtling tak buatsaih a ni chu lawmawm a tih thu a sawi a, “Nunna hi a hlu a, mihring min tihlimtu ber chu hriselna a ni,” a ti a, Mihring hriselna kawnga thawktu Health Department chu an pawimawhzia hriaa, an hnathawh piah lamah an tawngkam leh chezia in mi te rilru leh taksa a tidam thei tih hre thar leh turin a chah bawk.

Kayakalp hi Central Scheme niin, kum 2015 atanga hman tan a ni a. He program hi   Swachh  Bharat  Abhiyan hnuaia Sawrkar damdawi In - District Hospital, Sub District Hospital/Community Health Centre (CHC), Primary Health Centre (PHC) leh Urban Primary Health Centre (UPHC) te tehfung hrang hrang hmanga endik  a ni a, lawmman atan thuziak leh pawisafai hlan an ni a. District Hospital fai ber atan Lawngtlai District Hospital chu thlan niin Champhai leh Serchhip District Hospital ten an dawt a. Special Prize, Mera Aspataal Award chu Mamit leh Lawngtlai District Hospital hnenah hlan an ni a. Sub-District Hospital/Community Health Centre zingah Sakawrdai CHC in lawmman pakhatna dawngin Kawrthah CHC leh Biate CHC ten dawtin Special Award, Most Improved Award chu Chawngte CHC hnenah hlan a ni.

Urban Primary Health Centre zingah Hlimen UPHC in lawmman pakhatna dawngin Sazaikawn UPHC leh Chawlhhmun UPHC ten an dawt a. PHC fai thlanna erawh District hrang hrangah neih theuh niin Mizoram pum khaikhawm a ni ve lo thung a ni.

Comments

Chhiar Hlawhte