Mizoram-ah COVID-19 hri kai 7 hmuh belh leh an ni

Niminpiah-a Mizoram-a Sample enfiah atangin COVID-19 hri kai mi 7 hmuh belh leh an ni a, hun engemaw chen hnuah ZMC Laboratory-a Sample enfiah atangin hri kai hmuhchhuah an awm lo thung.

Sawrkar thuchhuah tarlan danin niminpiah khan ZMC Laboratory-ah Sample 349 enfiah niin heng atang hian COVID-19 hri kai hmuhchhuah an awm lova, thla thum chhung vel zet chu hetianga Sample enfiah si-a hri kai hmuhchhuah loh hi an awm tawhlo a ni. Niminpiah khan District hrang hranga TrueNat Laboratory-a sample enfiah 129 atangin hri kai 3 hmuhchhuah an ni thung a, Champhai Bethel Veng-ah hri kai naupang pahnih hmuh niin tualchhung-a hri kaichhawng an ni a, Lawngtlai District-ah hri kai mi pakhat hmuh niin Border Roads Organisation (BRO) mi leh sa, tualchhung a hri inkaichhawng a ni.

Niminpiah khan Mizoram-ah Rapid Antigen Test hmangin Sample 499 enfiah niin hri kai mi 4 hmuh an ni bawk a, an zinga mi 3 te chu Lawngtlai District-a Paithar-a tualchhung-a hri inkaichhawng an ni a, midang pakhat hi Lunglei District-a hri kai hmuhchhuah niin  Staff Nurse zir tum interview-a kal chu hri a kai tih hmuhchhuah a ni a, hri a kaina hi chhui zui nghal a ni bawk.

Heti hian Mizoram a Sample enfiah zawng zawng chu 1,53,180 niin COVID-19 hri kai hmuhchhuah chu 3888 an tling ta a, Sample enfiah zawng zawng atanga zaa 2.54 te chuan hri hi kai tawhin nimin khan hri kai mi 35 te chu anmahni enkawlna hmun atanga chhuahtir niin hri kai enkawl dam 3682 an awm tawh a, hri kai hmuchhhuah atanga zaa 94.70 te enkawl dam ni tawhin hri kai enkawllai 200 an la awm mek a ni.

India-ah hri kai nuai 90 chuang an dam tawh :

India rama COVID-19 hri kai enkawl dam chu nuai 90 an chuang ta a, darkar 24 kalta chhung khan mi 42,916 te chu enkawl dam leh an ni. Ministry of Health & Family Welfare chhinchhiahna atanga a lan danin darkar 24 kalta chhung khan India ramah Sample 11,70,102 enfiah leh niin heng atang hian hri kai 36,595 hmuh belh leh niin tun thlengin India rama Sample enfiah zawng zawng chu 14,47,27,749 an ni ta a, heng atang hian hri kai 95,71,559 hmuhchhuah an ni tawh a ni.

Darkar 24 kalta chhung khan India rama hri kai 42,916 te chu enkawl dam leh niin tun thlenga hri kai enkawl dam chu 90,16,289 an tling ta a, hri kai hmuhchhuah atanga zaa 94.20 te chu enkawl dam ni tawhin tunah hian hri kai enkawllai 4,16,082 an la awm a, darkar 24 kalta chhung khan India rama hri kai zingah nunna chan 540 awm lehin tun thlengin India rama hri kai zingah nunna chan 1,39,188 an awm ta a, hei hi hri kai hmuh-chhuah atangin zaa 1.45 a ni bawk.