Mizoram-ah hri kai hmuhchhuah awm belh zel

Zirtawpni-a Mizoram-a Sample enfiah atangin COVID-19 hri kai mi 25 hmuhchhuah niin Inrinni-a Sample enfiah atangin hri kai 21 hmuh belh leh an ni bawk.

Zirtawpni khan ZMC Laboratory-ah Sample 449 enfiah niin COVID-19 hri kai mi 7 hmuh leh an ni a, District hrang hranga TrueNat Laboratory-ah Sample 168 enfiah niin hri kai 12 hmuh an ni a, Rapid Antigen Test hmanga Sample 733 enfiah atangin hri kai mi 6 hmuh an ni bawk a, hri kai hmuhchhuah zinga 15 te hi State pawn atanga rawn lut niin midang 10 te hi tualchhung-a hri inkaichhawng an ni thung.

Inrinni khan ZMC Laboratory-ah Sample 410 enfiah leh niin hri kai mi 5 hmuh niin District hrang hranga TrueNat Laboratory-a Sample 206 enfiah atangin hri kai 4 hmuh an ni a, Rapid Antigen Test hmanga Sample 528 enfiah atangin hri kai 12 hmuh an ni bawk. Inrinni-a ZMC Laboratory-a hri kai hmuhchhuah mi 5 te hi Aizawl District-a Sample lak vek niin State pawn atanga rawn lut vek an ni a. TrueNat Laboratory-a hri kai hmuhchhuah mi 4 zinga pathum hi State pawn atanga rawn lut niin pakhat hi tualchhung-a hri inkaichhawng a ni. Rapid Antigen Test hmanga hri kai hmuhchhuah mi 12 zinga 8 te chu Lawngtlai Council Veng ami te an ni a, Aizawl District-ah State pawn atanga rawn lut hri kai pahnih hmuh niin Lunglei District-ah hri kaina hriatloh mi pahnih hmuhchhuah an ni bawk.

Heti hian nimin thlenga Mizoram-ah COVID-19 hri kai hmuh tawh chu 3934 an tling ta a, an zinga 3723 te chu enkawl dam ni tawhin tunah hian hri kai enkawllai 205 an la awm mek a, Mizoram-a hri kai te zingah nunna chan mi 6 an awm tawh nia chhinchhiah la niin Mizoram-a hri kai hmuhchhuah atangin zaa 94.63 te chu enkawl dam an ni tawh a, nimin khan Mizoram-ah hri kai 15 te chu enkawl dam leh an ni bawk.

India-ah hri kai enkawl dam nuai 91 tling ta :

India rama COVID-19 hri kai enkawl dam chu nuai 91 an tling ta a, darkar 24 kalta chhungin hri kai 41,970 te chu enkawl dam leh an ni. Ministry of Health & Family Welfare chhinchhiahna atanga a lan danin darkar 24 kalta chhung khan India ramah hri kai 41,970 enkawl dam niin heng te nen hian tun thlenga India rama hri kai enkawl dam chu 91,00,792 an tling ta a, hei hi hri kai hmuhchhuah tawh 96,44,222 atanga chhutin zaa 94.37 an ni.

Darkar 24 kalta chhung khan India ramah hri kai 36,011 hmuh belh leh niin tunah hian India ramah COVID-19 hri kai enkawllai 4,03,248 an la awm mek a, hei hi hri kai hmuhchhuah atangin zaa 4.18 niin hri kai zingah nunna chan 482 an awm belh leh bawk a, tun thlengin nunna chan 1,40,182 an tling tawh bawk a ni.