State danga-a an kal anga kal a fuhlo thei tih sawi

Chief Minister, Zoramthanga chuan Mizoram chu tlangram, ruahtui tamna hmun a nih avangin NHIDCL ten State dang, phai ram-a hma an lak dan ang ngawt a kal a fuhloh theih thu a sawi.

Zrtawpni tlai a National Highways and Infrastructure Development Corporation Limited (NHIDCL) hnuaia Mizoram bialtute nen a Pisa-ah an inkawmna ah he thu hi sawiin Chief Minister chuan India ram zawng zawng angkhat-a hrutrual a rem loh thu a sawi a. Mizoram chu India leh Asia chhimchhak ram te inthlunzawmna pawimawh tak State a nih avang leh, ram hmasawnna tur hmalakna dang innghahna atan kawng tha leh changtlung tak neih a pawimawh avangin, NHIDCL chu Mizoram mipuite nen thawhhona tha tak an neih a pawimawh thu a sawi a, an hmalakna ah thahnemngai taka theihtawp chhuah turin a chah bawk.

NHIDCL hotute chuan Technology thar hmangin tun aia ruahtui dawl thei tur kawng siam an tum thu te, COVID-19 hrileng avanga duh anga an thawh chak theihloh thu te sawiin, Mizoram sawrkarin nena thawhhona tha tak zui zel an duh thu an sawi bawk.