Deputy Chief Minister in lungphum a phum

Ramhlun South Multi-Utility Centre sakna tur lungphum chu nimin zing khan Deputy Chief Minister, Tawnluia chuan a phum a, Multi-Utility Centre hi kum 2 chhunga sak zawh hman tura ruahman a ni.

Ramhlun South High School tualzawl-a Multi-Utility Centre sakna tur lungphum phumna puala inkhawm ah hian UD&PA Department changtu Deputy Chief Minister, Tawnluia chuan Mizoram chhunga khawpui 23 enkawl leh cheibawl hna thawka, khawpuia cheng miretheite dawmkan nana hma latu UD&PA Department chu Department naupang ni mah se thang duang leh thawh hlawk tak a ni, a ti a. Central sawrkar atanga sum lo kal leh Mizoram sawrkar sum hmangin kawng hrang hrangin khawpui tih hmasawn nan hma an la tih sawiin, tuna lungphum phum tak Multi-Utility Centre pawh hi khawtlangin tangkai taka hman theih tura duan a nih thu a sawi .

UD&PA changtu Deputy Chief Minister chuan khawpui chung tihhmasawn nana hma lak a nih rualin vantlang in an chhawr tam theih tur chu an ngai pawimawh zual tih sawiin, COVID-19 hri leng avanga sawrkarin harsatna a tawh avangin duh anga chakin hma lak theih ni rih lo mahse vantlang tana tul leh pawimawh atana ruahmanna siam mek puitlinna an hmu zel thei chu a lawmawm tak zet tih a sawi a, ram in hma a sawn zel theih nan sawrkar tawiawm zel turin mipuite a sawm a ni.

Multi-Utility Centre sakna tur hian Rs. 3,29,31,900/- dah niin kum hnih (2) chhunga sak zawh tura ruahman a ni a. Building hian chhawng 6 a nei anga, a mamawh apiang hman theih tur Utility Room chhawng thum dah a ni ang a, Floor khatah Hall a awm anga, Floor hnihah lirthei ke pali nei 32 leh ke hnih nei 56 hun theihna tur siam a ni bawk ang.