Mizoram-ah COVID-19 hri kai 5 hmuh belh an ni

/

Niminpiah khan Mizoram-ah COVID-19 hri kai mi 5 hmuh belh leh niin an vai hian tualchhung-a hri inkaichhawng vek an ni.

Nimin (Pathianni) khan ZMC Laboratory chu khar a nih avangin Sample enfiah a awm lova, District hrang hranga TrueNat Laboratory-ah Sample 77 enfiah niin hri kai hmuhchhuah thar an awm lova, Rapid Antigen Test hmanga Sample 222 enfiah atangin hri kai mi 5 hmuh an ni thung. Heng hri kai hmuhchhuah zinga mi 4 te hi Aizawl Bawngkawn-a chhungkaw pakhat ami niin Nu ber hi Frontline Worker, ZMC-a COVID-19 hri kai enkawltu Staff Nurse a ni a, an vai hian taksa-a hri kai lanchhuahna nei vek an ni. Hri kai hmuhchhuah pakhat hi Sihphir Venghlun mi niin tunhnaia tualchhung-a hri inkaichhawng nia hriat a ni.

Heti hian nimin thleng khan Mizoram-ah sample 1,64,535 enfiah ni tawhin COVID-19 hri kai hmuhchhuah chu 4040 an tling ta a, Sample enfiah atanga 2.45 te chuan hri kaiin hri kai zinga 3869 te chu enkawl dam an ni tawh a, tunah hian hri kai enkawllai 164 la awmin hri kai zingah nunna chan 7 awm tawhin nimin khan mi 22 chhuahtir an ni.

India-ah hri kai enkawl dam an pung chho zel :

India ramah COVID-19 hri kai nuai 98 chuang hmuhchhuah an ni tawh a, hri kai zinga nuai 93 chuang enkawl dam an ni tawh thung. Ministry of Health & Family Welfare chhinchhiahna atanga a lan danin darkar 24 kalta chhung khan India ramah Sample 8,55,157 enfiah leh niin heng atang hian COVID-19 hri kai 27,071 hmuh leh an ni a, heng te nen hian tun thlengin India ramah Sample 15,45,66,990 enfiah ni tawhin hri kai hmuh tawh zawng zawng chu 98,84,100 an ni a, Sample enfiah atanga za zela 6.39 te chuan hri hi an kai a ni.

Darkar 24 kalta chhung khan India ramah hri kai 30,695 te chu enkawl dam leh niin heng te nen hian tun thlenga India rama hri kai enkawl dam chu 93,88,159 an tling tawh a, hei hi hri kai hmuhchhuah atangin zaa 94.98 niin tunah hian hri kai enkawllai 3,52,586 an la awm mek a ni. Darkar 24 kalta chhung khan India rama hri kai zingah nunna chan 336 an awm leh a, heng te nen hian tun thlenga India rama hri kai zinga nunna chan chu 1,43,355 an tling tawh a, hei hi hri kai hmuhchhuah atangin zaa 1.45 an ni bawk.

Comments

Post a Comment

Popular News (Last 30 Days)

A hun pangngai ah Pavalai Intawhkhawmna neih tum a ni

/
Image
April 12-14, 2024 chhunga Mizoram pum huap Kohhran Pavalai Pawl Intawhkhawmna neihna tur East Lungdar tlang-a Pandal sak chu tukin zing-a thli tleh khan a tichhe vek a. Vawiin vek-a Organising Committee thutkhawm hmanhmawh neih chuan a hun pangngai a neih tumin Pathian chakna ringin inbuatsaihna kalpui nise an ti a. Naktuk (April 1, 2024) atangin Pandal chhia senghawi hna leh Pandal sak that hna chu a khawnat-a thawh nghal tum a nih thu East Lungdar Village Council President K. Lalngaizuala chuan LENKAWL a hrilh.
Kimchang zawkin »

LPG man bithliah thar a ni

/
Image
IOCL in Revised Retail Selling Price a tihchhuah angin Mizoram chhunga eirawngbawlna gas man chu bithliah thar leh a ni a, Vairengte tih loh Mizoram hmundang zawngah chuan LPG Domestic Cylinder kg. 14.2 a rit man chu bur khat Rs. 955/- niin kg. 19-a rit Commercial Cylinder chu Rs. 2224.50 leh kg. 19-a rit XtraTeJ chu Rs. 2247/- a ni anga, kg. 10 a rit Composit Cylinder chu Rs. 688.50 a ni bawk ang. Gas man hi Home Delivery kalpuina ah chuan bur khat ah Rs. 70/- aia tam lo belh tur a ni anga, Home Delivery kalpui thei nganglo Veng, Point delivery kalpuinaah chuan Rs. 7.53 zel belh tur a ni a. Godown-a hralh erawh chuan Rs.33.43 zel paih thung tur a ni.
Kimchang zawkin »