Mizoram-ah COVID-19 hri kai 31 hmuh belh leh an ni

/

Niminpiah-a Mizoram-a Sample enfiah atangin COVID-19 hri kai 31 zet hmuhchhuah leh an ni a, an zinga 15 te chu State pawn atanga rawn lut niin tualchhung-a hri inkaichhawng an awm leh nual bawk.

ZMC Laboratory-ah niminpiah khan Sample 442 enfiah niin hri kai mi 7 hmuh belh an ni a, District hrang hranga TrueNat Laboratory-ah Sample 154 enfiah niin hri kai 11 hmuh an nih bakah Rapid Antigen Test hmanga Sample 755 enfiah ah hri kai mi 13 hmuh an ni bawk. ZMC Laboratory atanga hri kai hmuhchhuah mi 7 zinga mi 5 te hi Zoram Medical College (ZMC) a building sak hnathawk tura Assam atanga rawn lut niin midang pakhat hi Dawrkai, mahni inrinhlelhna neih avanga Sample inenfiah tir a ni a, hri kai pakhat hi a chanchin hriatchian ala ni lo thung.

TrueNat Laboratory atanga hri kai hmuhchhuah mi 11 te hi Lunglei District-a hri kai hmuhchhuah vek niin tunhnaia State pawn atanga rawn lut vek an ni a, APS Hydro Pvt. Ltd. hnuaia thawk tur mi 8 bakah Tlabung mi pahnih leh BSF Sipai pakhat te an ni. Rapid Antigen Test hmanga hri kai hmuhchhuah mi 13 zinga mi 8 te hi Lawngtlai-a tualchhung a hri inkaichhawng an ni a, Aizawl District-ah hri kai 4 hmuh niin an zinga mi pathum te hi hri an kaina hriat a ni lova, pakhat hi tualchhunga hri in-kaichhawng a ni bawk. Serchhip District-a tualchhung-a hri inkaichhawng pakhat hmuh niin tunhnaia Thenzawl-a hri kai hmuhchhuah tawh te nena cheng ho an ni bawk.

Nimin khan Mizoram-a COVID-19 hri kai mi 12 te chu hri lakah fihlimin anmahni enkawlna hmun atanga chhuahtir leh an ni a, heti hian nimin tlai dar 5:00 thleng khan Mizoram-ah sample 1,67,275 enfiah ni tawhin hri kai 4080 hmuh an ni tawh a, an zinga 3906 te chu enkawl dam ni tawhin hri kai enkawllai 167 an la awm mek a, hri kai zingah nunna chan mi 7 awm tawhin hri kai hmuhchhuah atanga zaa 95.73 te chu enkawl dam an ni tawh a ni.

India ramah hri kai thar leh dam awm belh zel :

Darkar 24 kalta chhung khan India ramah COVID-19 hri kai 26,382 hmuh belh niin 33,813 enkawl dam an ni bawk. Darkar 24 kalta chhung khan India ramah Sample 10,85,625 enfiah niin heng atang hian hri kai 26,382 hmuh an ni a, heng te nen hian tun thlenga hri kai hmuh tawh chu 99,32,547 an ni ta a ni. Darkar 24 kalta chhunga hri kai enkawl dam 33,813 te nen hian tun thlengin India ramah hri kai 94,56,449 enkawl dam an ni tawh bawk a, hei hi hri kai hmuhchhuah atanga chhutin zaa 95.21 niin tunah hian hri kai enkawllai 3,32,002 an la awm mek a. Hri kai zingah nunna chan 387 awm belh lehin tun thlengin India rama hri kai zingah nunna chan 1,44,096 an awm tawh a ni.

Comments

Post a Comment

Popular News (Last 30 Days)

A hun pangngai ah Pavalai Intawhkhawmna neih tum a ni

/
Image
April 12-14, 2024 chhunga Mizoram pum huap Kohhran Pavalai Pawl Intawhkhawmna neihna tur East Lungdar tlang-a Pandal sak chu tukin zing-a thli tleh khan a tichhe vek a. Vawiin vek-a Organising Committee thutkhawm hmanhmawh neih chuan a hun pangngai a neih tumin Pathian chakna ringin inbuatsaihna kalpui nise an ti a. Naktuk (April 1, 2024) atangin Pandal chhia senghawi hna leh Pandal sak that hna chu a khawnat-a thawh nghal tum a nih thu East Lungdar Village Council President K. Lalngaizuala chuan LENKAWL a hrilh.
Kimchang zawkin »

LPG man bithliah thar a ni

/
Image
IOCL in Revised Retail Selling Price a tihchhuah angin Mizoram chhunga eirawngbawlna gas man chu bithliah thar leh a ni a, Vairengte tih loh Mizoram hmundang zawngah chuan LPG Domestic Cylinder kg. 14.2 a rit man chu bur khat Rs. 955/- niin kg. 19-a rit Commercial Cylinder chu Rs. 2224.50 leh kg. 19-a rit XtraTeJ chu Rs. 2247/- a ni anga, kg. 10 a rit Composit Cylinder chu Rs. 688.50 a ni bawk ang. Gas man hi Home Delivery kalpuina ah chuan bur khat ah Rs. 70/- aia tam lo belh tur a ni anga, Home Delivery kalpui thei nganglo Veng, Point delivery kalpuinaah chuan Rs. 7.53 zel belh tur a ni a. Godown-a hralh erawh chuan Rs.33.43 zel paih thung tur a ni.
Kimchang zawkin »