Latest News

Thenzawl-ah hri danna pe tan; ni 2 chhungin mi 306 te hri danna pe tawh

Serchhip District-a COVID-19 Vaccine pek mekah nimin khan Thenzawl CHC-ah hri danna hi pek tan ve leh a ni a, he hun hi Thenzawl SDO (C), Kulothungan A, IAS chuan hmanpuiin sawrkar ruahman anga Vaccine lak runpui India ramah kalpui a ni leh Thenzawl-ah pawh kalpui theih a ni chu lawmawm a tih thu sawiin, Vaccine chuan mipui himna a thlen ngei a beisei thu a sawi.

Mizoram COVID-19 dinhmun thlirletna neiin Hunpui vuakvet-ah mipuite fimkhur lehzual tul an ti

Nimin khan Health Minister, Dr. R. Lalthangliana hovin Mizoram COVID-19 dinhmun thlirhona neih a ni a, hunpui lo thleng turah hri leng laka fimkhur lehzual a tul thu he hunah hian tarlan niin, hunpui vuakvetah chhungkaw chengho nilo chu chhungkhat laina chaw eikhawm leh inhmuhkhawm buatsaih loh nise an duh thu an sawi.

SAD Conference Hall-a he thutkhawm neih ah hian Health Minister, Dr. R. Lalthangliana chuan Chief Minister, Zoramthanga'n COVID-19 dona kawngah nasa takin tan a la tih sawiin, “Sum lamah pawh harsatna awm lovin a inhawng em em a, a kaihhruaina hnuaiah mi zawng zawng kan tanrual avangin tun dinhmun hi kan thleng thei a ni,” a ti a. Tlawmngai taka COVID-19 dona kawnga thawktu, COVID-19 Volunteers te lawmman tur pawh peihfel tawh a nih thu leh Krismas hma ngeiin pek tum an nih thu a sawi bawk.

He hunah hian I&PR Minister, Lalruatkima pawhin sawrkar, tlawmngai pawl leh Kohhran tanhona tha hi khawvel hmun dangah a awm bika a rin loh thu sawiin, hei hi COVID-19 dona kawnga kan hlawhtlinna pawimawh ber pakhat a ni, a ti a. Thingtlang lama cheng ten COVID-19 vanga harsatna an tawh loh nan MGNREGA kaltlangin ni 100 inhlawhna theihtawpa chaka bawhzui a nih thu leh kumin December thla thleng hian chawhrualin Mizoram pumah ni 90/100 inhlawhna siam a ni tawh a, siam belh leh turin sawrkar laipui lamah nawr mek a ni, a ti bawk.

He thutkhawm-a tel te hian hunpui lo thleng turah fimkhur a tul lehzual tih sawiin, Zan curfew dar 8:00 atanga tan chu khauh lehzuala kalpui tha an ti a, kan chetsual palh chuan hunpui boruak avang hian hri kai darh huk thei kan nih avangin a hma zawng aia strict leh fimkhur lehzuala sawrkar Dan siamte kenkawh nise an ti a, dawr leh sumdawnna hmuna SOP zawmlo te chungah pawh khauh taka action lak tha an ti bawk.

Khawvel hmundanga zirchianna tunhnaia neihah chhungkaw inhmuhkhawmna atanga hri inkaidarh an tam tih he hunah hian tarlan niin, Mizoram-ah ngei pawh hetiang hi a awm nual tawh tih tarlan a ni a. Mipuite chu hunpui vuak-vetah chhungkaw chengho nilo chu chhungkhat laina chaw eikhawm leh inhmuhkhawm buatsaih loh nise an duh thu an sawi a, chutiang bawkin thianho leh pawlho inhmuhkhawm pawh sawrkar dan bawhchhe zawnga neih loh nise an duh thu an sawi a ni.

November thla tira Lockdown puanin a tha zawnga awmzia a neih thu tarlan a ni a, hri kai hmuhchhuah tharte pawh State pawn atanga rawn lut a tam zawk an nih thu tarlan a niin, Contact Tracing lamah pawh harsatna em em an tawh rih loh thu tarlan a ni a. Pawl hrang hrang aiawha sawmte pawhin sawrkarin COVID-19 dona atana dan a siam SOP te chu tun dinhmunah a tha tawk hle a an hriat thu sawiin, mipuite pawhin an zawm that chhunzawm zel a pawimawh tih an sawi bawk.

Khawpui atanga hunpui hmang tura mahni khaw lama haw turte chu an haw hun bituk loh tur a ni tih he hunah hian tarlan niin, hripui leng laka invenna kawnga zawm tur pawimawh zingah Mask vuah chu mipuiten an zawm tha thawkhata hriat a ni a, Social Distancing zawm kawngah tun aia fimkhur lehzual a tul thu tarlan a ni bawk.

Hei bakah hian COVID-19 vaccine chungchang report pek niin Sawrkar Laipuiin a dawng tur chin strict taka a rawn bithliah thu tarlan a ni a, a buaipuitu tur Committee pawh State, District leh Block Level-ah din vek a nih tawh thu tarlan a ni a. Awlsam taka pan theih Sample Test na tur hmun Kiosks pawh hmun hnih Junior Cooperative Centre, Chawlh-hmun leh Bawngkawn South Cultural Centre-ah niminpiah atang khan kalpui tan a nih thu tarlan a ni bawk.

He hunah hian ZMC-ah COVID-19 hri kai 20 enkawl mek an nih thu leh dinhmun hlauhthawnawm an awmloh thu tarlan a ni bawk.

Comments

Chhiar Hlawhte