Latest News

Thenzawl-ah hri danna pe tan; ni 2 chhungin mi 306 te hri danna pe tawh

Serchhip District-a COVID-19 Vaccine pek mekah nimin khan Thenzawl CHC-ah hri danna hi pek tan ve leh a ni a, he hun hi Thenzawl SDO (C), Kulothungan A, IAS chuan hmanpuiin sawrkar ruahman anga Vaccine lak runpui India ramah kalpui a ni leh Thenzawl-ah pawh kalpui theih a ni chu lawmawm a tih thu sawiin, Vaccine chuan mipui himna a thlen ngei a beisei thu a sawi.

Chanchin thar thenkhat :

Wood Based Industries Licence pe

The Mizoram Wood Based Industries (Establishment & Regulation) Rules, 2017 leh a hnu zela siamrem hret hret zul zuiin Mizorama a hmasa ber atan Wood Based Industries Licence chu nimin khan Mamit Forest Division hnuaiah pek-chhuah a ni a. Wood Based Industries te hi chi hnih-ah then niin Primary Wood Based Industries chuan thing tum (log) atanga thildang siam lehna a huam deuh bik a, Secondary Wood Based Industries chuan thing zai sa leh hmanrua siamsa atanga thildang siam lehna hmun a kawk deuh bik thung a, phalna bik nei an nih loh chuan thing tum (logs) zai phal a ni lo a ni. Nimin-a License pekchhuahte hi Lalhmangaihi (Hriata Enterprise & Saw Mill) leh Maggie Lalnunsangi (DCM Wood Based Industries) te an ni.


DEO leh DPO Office hawng

School Education Minister, Lalchhamdama Ralte chuan nimin khan Saitual-ah District Education Office leh Samagra Shiksha District Project Office te a hawng a, heng Office thar hawnna ah hian Education Minister chuan Saitual DEO leh DPO hawn a ni ta chu Saitual District chanchin ah ni pawimawh tak a nih thu sawiin, COVID-19 karah thawktute thawhhona a that avangin Office hawn theih a lo ni ta tih a sawi a. Tunhnaia sawrkarin zirtirtu a lak tharah a thiam thiam, a fit fit lak an ni tih sawiin, politics a inrawlh lo tih a sawi bawk. School Education Minister hian niminpiah khan Khawzawl-ah DEO Office leh DPO Office te a lo hawng tawh bawk a ni.


Petrol Dispensing Unit hawng

Cooperation Minister, C. Lalrinsanga chuan nimin zing khan Aizawl Treasury Square-a MI-ZOFED Petrol Pump-ah MIZOFED in a bik taka Two Wheeler tana Petrol Thunna an siam, Petrol Dispensing Unit chu a hawng a, MIZOFED in Oil an pekchhuah chu a thianghlim tawk tura ngaih a nih thu sawiin, Oil (POL) kan hnianghnar zawk theih nan sawrkarin Bairabi-ah Oil Depot chang-tlung zawk buatsaih a tum mek tih a sawi bawk.


Coaching-a kal tur thlang

Mizoram Youth Commission buatsaih Mizo thalai Delhi-a IAS Coaching kal tur Full Sponsorship thlanna, Written Exam (State Level Screening Exam) chu nimin khan Pachhunga University College-ah neih a ni a, he Exam hmachhawn tur hian mi 282 inziaklutin mi 208 ten Exam hi an hma-chhawn a, heng Exam atang hian a titha zual 40 te chu Personal Interview nei tura tur a koh an ni ang a, interview atang hian mi 20 thlanchhuah leh an ni dawn a. Tun thla ni 17 leh 18 chhung khian Personal Interview hi neih a ni ang.

Comments

Chhiar Hlawhte