Latest News

Mizoram-ah COVID-19 hri kai 22 hmuh belh an ni

Niminpiah khan Mizoram-ah COVID-19 hri kai mi 22 hmuhchhuah leh an ni.

Niminpiah khan ZMC Laboratory-ah Sample 375 enfiah niin COVID-19 hri kai mi 11 hmuhchhuah leh niin District hrang hranga TrueNat Laboratory-a Sample enfiah 183 atangin hri kai 2 hmuhchhuah a ni bawk a, Rapid Antigen Test hmanga Sample 1119 enfiah atangin hri kai 9 hmuhchhuah an ni bawk. Niminpiah a ZMC Laboratory atanga hri kai hmuhchhuah te hi Aizawl District-a sample lak vek an ni a, an zinga mi 5 te chu State pawn atanga rawn haw niin midang 6 te hi Aizawl Chaltlang mi, tualchhung-a hri kaichhawng an ni thung.

District hrang hrang TrueNat Laboratory-a hri kai hmuhchhuah te hi Champhai District leh Saitual District-a hri kai hmuhchhuah niin State pawn atanga rawn haw ve ve an ni a, Rapid Antigen Test hmanga hri kai hmuhchhuah te hi Lawngtlai District-ah mi 4, Champhai District Zokhawthar-ah mi 4 leh Sihphir leh Bawngkawn-ah mi pakhat ve ve an ni a, Bawngkawn-a hri kai pakhat hmuh hi hmeichhia kum 47 mi niin Missionary a ni a, thlakhat liamta-a State pawn atanga rawn haw a ni.

Nimin khan Mizoram-a COVID-19 hri kai enkawl dam mi 73 te chu chhuahtir niin heti hian nimin tlai thleng khan Mizoram-ah hri kai 3847 hmuh an ni tawh a, an zinga  3572 te chu enkawl dam ni tawhin tunah hian hri kai enkawllai 269 an la awm mek a, mi 6 an thi tawh a ni.

COVID-19 hri kai nunna chan awm belh leh :

Mizoram-a COVID-19 hri kai enkawllai, Lalbiakenga (41), Falkland Veng Aizawl chu nimin zing khan khan State Referral Hospital, ZMC-ah a boral. Thudawn danin Lalbiakenga hi Synod Hospital-a damlohna neih avanga hun rei tak enkawl tawh niin COVID-19 hri a kai tih hmuhchhuah a nih hnuah State Referral Hospital-ah hian enkawl zui a ni a, amah hi natna dang neisa nia thudawn ni bawkin  nimin khan vuiliam nghal a ni. Heti hian Mizoram-a COVID-19 hri kai zingah nunna chan mi 6 an awm tawh nia chhinchhiah a ni.

Darkar 24 chhungin hri kai aiin dam an tam :

Darkar 24 kalta chhung khan India ramah COVID-19 hri kai hmuhchhuah thar aiin hri kai enkawl dam an tam zawk. Darkar 24 kalta chhung khan India ramah Sample 9,69,322 enfiah leh niin heng atang hian hri kai 31,118 hmuhchhuah thar leh an ni a, heng te nen hian India rama hri kai hmuhchhuah chu 94,62,809 an tling tawh a ni. Darkar 24 kalta chhung khan India ramah hri kai 41,985 enkawl dam leh niin tun thlengin hri kai 88,89,585 enkawl dam an ni tawh a, hei hi hri kai hmuh atangin zaa 93.94 a ni. Tun dinhmunah India ramah hri kai enkawllai 4,35,602 awmin hri kai zingah nunna chan 1,37,622 an awm bawk a ni.

Comments

Chhiar Hlawhte