Latest News

Chanchin thar thenkhat :

Mizoram in lawmman dawng

Chief Minister, Zoramthanga chuan nimin khan India Today in ‘e-State of the States Conclave & Awards 2020’ a buatsaih ah Mizoram chu State te (Small States) zinga Inclusive Development-a titha berah leh Economy, Health & Entrepreneurship-a hmasawn ber, Best Performing Small State in Inclusive Development and Most Improved Small State in Entrepreneurship, Economy, Health-ah thlan a nih thu a puang a. He lawmman hi India Today in India State tin ten an chhunga cheng mipuite tan eizawnna leh ei-zawnna pawn lama remchanna a siam a sak dan a tehna a ni a. Tehfung hrang hrang - Economy, Agriculture, Education, Healthcare, Infrastructure, Environment leh faina leh thianghlimna te hman a ni.


AMC Draft Roll tarchhuak

Aizawl Municipal Corporation (AMC) inthlanna neih tur atana inbuatsaihna atan nimin khan Electoral Roll siamthat hna thawh tur atan Draft Electoral Roll tarchhuah a ni. State Election Commission thuchhuak angin AMC Electoral Rolls Summary Revision, 2020 hi neih Aizawl Municipal Corporation chhungah hian Ward 19 awmin, Draft Electoral Roll-ah hian vote nei Hmeichhia 1,17,195 leh Mipa 1,01,675, an vaiin 2,18,870 an awm a, Mipa aia Hmeichhia vote nei thei an tamna chu vote 15,520 a ni. Draft Electoral Roll tarchhuah a nih hnu hian hming thun thar, paih, siamthat ngai leh insawn duhte tan dilna thehluhna hun hawn nghal a ni bawk.


Chief Minister in tlangzarh

Art & Culture Department in a buatsaih Khawhar hla 30 awmna, 'Art & Culture Department Zaipawl Album Vol-I' chu nimin khan Chief Minister, Zoramthanga chuan Aizawl-a I&PR Auditorium-ah a tlangzarh a, Chief Minister chuan Art & Culture Department in khawhar chhungte hnemtu leh anmahni lenpuitu ten an zaipui theih tur, khawhar hla album an buatsaih chu lawm-awm a tih thu a sawi bawk.


Health Minister hovin ‘World AIDS Day’ hmang

Nimin Dec. 1, 2020 khan Mizoram State AIDS Control Society (MSACS) bultumin Dawrpui-a Multipurpose Hall-ah ‘World AIDS Day’ puala inkhawm neih niin he hun hi Health and Family Welfare Minister, Dr. R. Lalthangliana chuan a hmanpui a, he hunah hian Health Minister chuan Mizoram-ah HIV hri kai enkawllai 10,565 awmin ART Centre 8 neihsa bakah Lawngtlai leh District thar pathum-ah te hawng tura hmalak mek a nih thu a sawi bawk. Chhinchhiahna atanga a lan danin kumin Sept. thla thleng khan Mizoram-ah HIV hrik pai 23,092 hmuh an ni tawh a, 78.01% chu mipat hmeichhiatna atanga kaichhawng an ni.


Hnahthial DC Office luah thar

Hnahthial SDO (Civil) Office building atana sak thar, Rallang Tlang ami chu nimin khan DC Office atan luahluh a ni a, Pathian hnena hlanna neih nghal a ni bawk. Hnahthial DC Office luah thar hi Hnahthial District function hma, kum 2018 atanga sak niin SDO (C) Office atan ruahman a ni a, cheng nuai 128 senga sak a ni.


TIPM hruaitu ten tlawh

Thangram Indigenous Peoples Movement (TIPM) leh MZP General Hqrs. hruaitute chuan nimin khan Aizawl-a Mizo Hnam Run leh Congress Bhavan te tlawhin TIPM hruaituten Mizoram sawrkar enkawlna hnuaia awm an duh chungchanga hmalakho zel dan tur an sawiho a, Party hruaitu ten an lo dawngsawng a ni.

Comments

Chhiar Hlawhte