Latest News

Thenzawl-ah hri danna pe tan; ni 2 chhungin mi 306 te hri danna pe tawh

Serchhip District-a COVID-19 Vaccine pek mekah nimin khan Thenzawl CHC-ah hri danna hi pek tan ve leh a ni a, he hun hi Thenzawl SDO (C), Kulothungan A, IAS chuan hmanpuiin sawrkar ruahman anga Vaccine lak runpui India ramah kalpui a ni leh Thenzawl-ah pawh kalpui theih a ni chu lawmawm a tih thu sawiin, Vaccine chuan mipui himna a thlen ngei a beisei thu a sawi.

Mizoram-ah COVID-19 hri kai 2 hmuh belh leh

Niminpiah khan Mizoram-ah COVID-19 hri kai mi pahnih hmuhchhuah an ni a, heng mite hi Serchhip District-a hri kai hmuh ve ve an ni.

Niminpiah khan ZMC Laboratory khar a nih avangin Sample enfiah a awm lova, District hrang hranga TrueNat Laboratory-ah Sample 14 enfiah niin hri kai hmuhchhuah an awm lova, Rapid Antigen Test hmanga Sample 627 enfiah ah hri kai pahnih hmuhchhuah niin heng mite hi Serchhip District-a hri kai hmuhchhuah ve ve an ni a, State pawn atanga tunhnaia Mizoram-a rawn lut ve ve niin taksa-a hri kai lanchhuahna nei ve ve an ni bawk. Nimin khan Mizoram-a hri kai 28 te chu enkawl dam niin anmahni enkawlna atangin chhuahtir an ni ve leh a, heti hian nimin thleng khan hri kai hmuhchhuah 3936 niin an zinga 3756 te enkawl dam an ni tawh a, tunah hian hri kai enkawllai 174 awmin zaa 95.42 enkawl dam an ni tawh a, hri kai zingah nunna chan mi 6 an awm tawh bawk a ni.

India ramah hri kai enkawl nuai 4 aiin tlem ta :

India rama COVID-19 hri kai enkawl dam chu nuai 91 aiin an tam ta a, India rama hri kai enkawllai pawh nuai 4 aiin an tlem tawh bawk. Ministry of Health & Family Welfare chhinchhiahna atanga a lan danin darkar 24 kalta chhung khan India ramah sample enfiah zat tlem hretin 8,01,081 enfiah a ni a, heng atang hian COVID-19 hri kai 32,981 hmuh leh niin heng te nen hian tun thlengin India ramah Sample 14,77,87,656 enfiah niin hri kai hmuhchhuah chu 96,77,203 an ni ta a, Sample enfiah atanga zaa 6.54 te chuan hri an kai a ni.

Darkar 24 kalta chhung khan India ramah hri kai 39,109 te chu enkawl dam leh niin tun thlenga hri kai enkawl dam chu 91,39,901 an tling tawh a, hei hi hri kai hmuhchhuah atanga chhutin zaa 94.45 a ni tawh bawk a, tunah hian hri kai enkawllai 3,96,729 an la awm mek a ni. Darkar 24 kalta chhung khan India rama hri kai zingah nunna chan 391 awm lehin tun thlengin hri kai zingah nunna chan 1,40,573 an awm tawh bawk a ni.

Comments

Chhiar Hlawhte