Latest News

LADC inthlanna ah MNF in hnehna an chang

Lai Autonomous District Council (LADC)-a Member of District Council (MDC) inthlanna a Vote tla te nimin a chhiar takah MNF party chuan sawrkar siam thei turin hnehna an chang.

LADC inthlanna neih zawh taka Vote tla te hi nimin khan Lawngtlai-ah chhiar a ni a, Seat 25-a inthlanna neih ah hian MNF Party chuan seat 20 zet lain Party mal-a sawrkar siam thei turin hnehna an chang a, BJP leh Congress ten Seat khat ve ve lain Independent Candidate ten seat thum an la bawk a ni.

MNF in MDC Seat an lakna te hi Sangau East, Sangau South, Sangau West, Cheural, Lungtian, Bualpui NG West, Bualpui NG East, Lawngtlai Bazar, Lawngtlai Vengpui, Lawngtlai Council Veng, Lawngtlai College Veng, Lawngtlai-III, Paithar, Diltlang South, Chawngte P, Sakeilui, Bungtlang South, Sekulh, Tuithumhnar leh Vathuampui te an ni a, BJP hian Vawmbuk-ah hnehna changin Congress hian Lungpher South-ah hnehna an chang bawk. Independent Candidate ten Seat an lak hi Lawngtlai Chandmary, Lawngtlai AOC leh M. Kawnpui te an ni a, LADC-ah a vawikhatna atan MNF MDC hlang in sawrkar an siam ve thei dawn ta a, Vawiin hian sawrkar din dan tur pawh hriatchian theih beisei a ni bawk.

Tun tum inthlanna ah hian MDC la ningailo mi 12 thlantlin an ni a, heng zing a 10 chu MNF Candidate niin,  Indian National Congress (INC) Candidate leh Independent Candidate pakhat ve ve an awm bawk.

Comments

Chhiar Hlawhte