Latest News

Thenzawl-ah hri danna pe tan; ni 2 chhungin mi 306 te hri danna pe tawh

Serchhip District-a COVID-19 Vaccine pek mekah nimin khan Thenzawl CHC-ah hri danna hi pek tan ve leh a ni a, he hun hi Thenzawl SDO (C), Kulothungan A, IAS chuan hmanpuiin sawrkar ruahman anga Vaccine lak runpui India ramah kalpui a ni leh Thenzawl-ah pawh kalpui theih a ni chu lawmawm a tih thu sawiin, Vaccine chuan mipui himna a thlen ngei a beisei thu a sawi.

Chanchin thar thenkhat :

Naupang huaisen chawimawi

Lunglei North bialtu MLA leh MYC Chairman, Dr. Vanlaltanpuia chuan Inrinni khan a bial chhung Pukpui-a Health Sub-Centre chu tlawhin, hemi bula Health department Bus pathum chhe tawh dah chunga Electrict hruipui kalin Pukpui naupang Moses-a a man tak chhanchhuaktu naupang huaisen pahnih- Jollin-a leh Joseph-a te chu chawimawi nan Rs.5000/- ve ve a pe a. Lunglei CMO, SMO leh Medical Superintendent-te chu Motor chu dahsawn a, auction thuai a nih theih nan a sawipui nghal bawk.

Dr. Vanlaltanpuia hian NH. 54, Aizawl to Tuipang road siam hna thawktu, NHIDCL Company General Manager chu a Office-ah kal chilhin hna chak leh tha zawka thawh a nih theihna tur te, thawktu atan tualchhung mi tam zawk an luh theih nan te, Community Social Responsibility (CSR) Fund chu mipui tan tha leh tangkai zawka hman a nih theih dante a sawipui bawk.


Hri leng dona thlirho a ni

Nimin khan Hnahthial-ah District Task Force on COVID-19 chu an Chairman leh District Bawrhsap ni bawk, Vanlalmawia hovin an thu-khawm a, he hunah hian COVID-19 do kawngah sum a hautak viau laiin Hnahthial District erawh chu leiba awm lutuk lova an la inenkawl chhoh theih thu tarlan niin Vaccine peih anih veleh a tul anga pechhuak tura sawrkar a inpuahchah mek thu tarlan a ni bawk. He thutkhawm ah hian an District chhunga khaw thenkhat chu Sawrkar ruahmanna zawm lova mahni duh dana kal thin an awm thu tarlan niin chung khuaa VLTF hruaitute chu sawrkar ruahmanna zawm tura hrilhhriat thar nise an ti bawk.


Vawiin ah Vote chhiar dawn

Lai Autonomous District Council (LADC) inthlanna neih a Vote tla te chu Vawiin hian Lawng-tlai-ah chhiar a ni dawn ta a, he inthlanna neih ah hian MDC bial 25-ah mipui ten vote thlakin Vawiin chawhma dar 10:00 hian chhiar tan a ni dawn a ni.

Book of the Year-ah ‘Falung’

Mizo Academy of Letters (MAL) chuan kum 2019 chhunga Mizo tawng-a lehkhabu chhuak tha ber, 'Book of the Year 2019' atan Lalengzauva ziak, 'FALUNG' tih chu an thlang a, tun thla ni 11-a MAL Annual Meeting-ah chawimawina hlan a ni ang.


MNYF in CM an chhuang

MNF Thalaite chuan hmasawnna tuipui em em rengtu Chief Minister zahawm tak, Zoram-thanga chu an chhuang hle tih an sawi. Nimin-a thuchhuah an siamah MNF Thalai, MNYF chuan tunhnaia India rama chanchinbu lar tak, India Today-in India ram State te (small state) zinga Inclusive Development-a titha ber leh Economy, Health & Entrepreneurship lama hmasawn bera Mizoram a thlang chu lawmawm an ti hle tih an sawi a, hripui leng avanga sum harsatna karah pawh theih ang anga hmasawnna hna (Development) kalpui zel vang nia a lan thu sawiin, hmasawnna tuipui em em rengtu Chief Minister zahawm tak, Zoram-thanga chu an chhuang hle tih an tarlang a ni.


MZP in an Pisa kharna nei

MZP General Hqrs. chuan Aizawl-a an Office, MZP Pisa Pui chu kumin atana kharna hun nimin khan an buatsaih a. He hunah hian MZP President, B. Vanlaltana chuan COVID-19 avangin kum 2020 chhungin MZP in an ruahmanna leh an beiseina angin Activity nei theilo mah se, an hmalakna chinah hlawhtlinna nasa tak an chang tih sawiin, hei hi an thawh-hona zar a nih thu a sawi a. Zirlaite chu Krismas leh Kumthar vuakvetah khawtlang tana mi tangkai ni tur leh mahni awmna hmun theuhah harsatna siamtu ni lova midang tana malsawmna ni vek turin duhsakna a hlan bawk. He hunah hian MZP Calendar 2021 tlangzarh a ni bawk.


Mamit khawpui enfiah a ni

Mizoram Cleanliness Competition, 2020 endiktu (Panel of Expert) Inspection Team te chuan nimin khan Mamit tlawhin District Bawrh-sap, Dr. Lalrozama hovin an lo dawngsawng a, he hunah hian District Urban Development Officer, C. Sawihlira chuan Mamit District-in faina kawnga hma a lakna hrang hrang tarlangin District chhung khua/veng hrang hrangah naupang kum 5 to 13 intelkhawmna Children Sanitation Club (CSC) 97 din a ni tawh tih a sawi a, zawhna leh chhanna hun hman a ni bawk.

Comments

Chhiar Hlawhte