Miss India-Mizoram atan Lalmuansangi Varte thlang

VLCC Femina Miss India 2020 State winner te chu nimin khan Official-in Miss India Organisation-in an puang ta a, Miss India Mizoram chu Lalmuansangi Varte niin, ani hian VLCC Femina Miss India 2020 thlannaah Mizoram ai a awh dawn ta a ni.

Miss India Organisation hian State 31 aiawh tur, State winner-te hi nimin khan puangin, Mizoram aiawh tuma hming pelut pahnih, Lalmuansangi Varte leh Celina Chakma te Online Interview an neihpui ve ve hnuah Muansangi hi Mizoram aiawh tura thlan a ni ta a ni. State winner thlanna ah hian Miss India Organisation lamin fair takin thil an kalpui niin an sawi a, Muansangi pawh hi State winner atan hian a phu reng avanga thlang an nih thu Miss India Organisation hian an hriattir a ni.

Feet 5.6-inch a sang, Muansangi hi Champhai Zotlang a cheng niin, English Literature-a Master degree nei a ni a, tunah hian Mizoram University-ah Bachelor of Education (B.Ed) a ti leh mek a, kumin kumtir-a Miss Mizoram 2020 thlannaah khan District winner niin, Champhai aiawhin a tel a, 2nd Runner-up (pathumna) a ni.