Hri kai 3 hmuh belh an ni

Niminpiah-a Mizoram-a Sample enfiah atangin COVID-19 hri kai mi pathum hmuh an ni a, an vai hian Aizawl Vaivakawn Veng ami niin chhungkhat a cheng an ni.

Niminpiah khan ZMC Laboratory chu khar niin District hrang hranga TrueNAT Laboratory-a Sample enfiah 109 zingah hri kai hmuhchhuah an awmlo bawk a, Rapid Antigen Test hmangin Mizoram-ah Sample 209 enfiah niin COVID-19 hri kai mi 3 hmuh an ni. 

Hri kai hmuhchhuah te hi mipa vek niin Aizawl Vaivakawn Veng-a pa pakhat chu a damloh avangin Private Hospital-ah inentirin damdawi In Screening Point-a enfiah a nih hnuah hri a kai tih hmuhchhuah a ni a, a chhungte sample test leh nghal niin a fapa te pahnih chuan hri an kai tih hmuhchhuah a ni bawk.

Nimin tlai thleng khan Mizoram-ah COVID-19 hri kai 3825 hmuhchhuah an ni tawh a, an zinga 3499 te chu enkawl dam ni tawhin tunah hian hri kai enkawllai 321 an la awm a, hri kai zingah nunna chan mi 5 an awm nia chhinchhiah ala ni bawk.

India-ah hri kai nuai 94 tling :

India ramah COVID-19 hri kai hmuh-chhuah chu nuai 94 an tling ta a, hri kai zinga nuai 88 chuang te enkawl dam an ni tawh. Darkar 24 kalta chhung khan India ramah Sample 8,76,173 enfiah niin hri kai 38,772 hmuh belh leh an ni a, heng te nen hian India rama hri kai hmuh tawh zawng zawng chu 94,31,691 an ni a, Darkar 24 kalta chhung khan India ramah hri kai 45,333 te chu enkawl dam leh niin tun thlenga hri kai enkawl dam chu 88,47,600 an tling tawh a, hei hi hri kai hmuhchhuah atanga chhut chuan zaa 93.81 niin tunah hian hri kai enkawllai 4,46,952 an la awm mek a ni.

India ramah hian hri kai zingah nunna chan 1,37,139 an tling tawh a, hei hi hri kai hmuh-chhuah atanga chhut chuan zaa 1.45 a ni bawk.