COVID-19 Vaccine chungchangah thu belhchian dawllo thehdarh lo turin mipuite an ngen

State Task Force for COVID-19 Vaccination chuan COVID-19 Vaccine hman tan theih hun tur ala hriatloh thu sawiin, Vaccine chungchangah thu belhchian dawllo thehdarh lo turin mipuite an ngen a. Vaccine lo chhuah hunah pawh hri inkaidarh thei laka la fimkhur zel a pawimawh dawn thu an sawi bawk.

COVID-19 hri danna (vaccine) pek dan tur ngaihtuahtu, State Task Force for COVID-19 Vaccination chu nimin khan an Chairman Health Secretary, H. Lalengmawia hovin SAD Conference Hall-ah an thukhawm a, he thutkhawm ah hian Dr. Lalhlimpuii, Surveillance Medical Officer, WHO-NPSP, Aizawl chuan an hmalakna te tarlangin, Sawrkar Laipui-a Ministry of Health & Family Welfare in khauh taka zawm tur ruahmanna a siam thu leh COVID-19 Vaccine dawng hmasa turin Healthcare Workers-te, kum upa te leh natna benvawn nei leh damdawi ei reng ngai damlo bithliah chin a nei tih a sawi a, heng mite hi an hming lakhawmin sawrkar laipui Database-ah khung luh vek tur an ni tih tarlan niin Vaccine a awm hunah a tahtawla pek tur an nih thu leh Database ami te lo chuan Vaccine an dawn theih dawn loh thu a tarlang a, Vaccine a awm hunah engzat nge Mizoram in a chan ve dawn tih hriat a la nih loh avangin a dawng tur zat pawh hi la tihfel theih a ni rihlo tih a tarlang bawk.

He thutkhawm ah hian Vaccine a lo chhuah hnuah pawh kut silfai uluk, Mask vuah leh Physical Distancing tha taka mipuiin an la zawm chhunzawm zel a pawimawh thu pawh tarlan niin, COVID-19 vaccine hi chi 3 - Nucleic Acid Vaccines, Viral Vector leh Inactivated Vaccines te chu India ram-a hman turin ruahman a nih thu leh India ram Company te vaccine siam chu Europe ram thenkhatte pawhin an beisei thu tarlan a ni.

State Task Force for COVID-19 Vaccination thukhawm chuan Vaccine hman tan theih hun tur a hriat loh thu leh, Vaccine chungchangah thu belhchiandawllo thehdarh lo turin mipuite an ngen a, Vaccine awm huna a dawng hmasa tur pawh sawrkar laipui ruahmanna anga kalpui ngei ngei a ngaih avangin thil awmzia hrethiam turin mipuite an ngen a ni.